Përpjekja e Presidentit Donald Trump për dhënien fund të programit që mbron imigrantët pa dokumente të cilët kanë ardhur në SHBA kur kanë qenë minorenë, është refuzuar nga Gjykata supreme.
Gjykata ka vendosur për rreth 650,000 imigrantë të rinj që ata të mund të vazhdojnë të jetojnë dh epunojnë në SHBA pa patur frikë nga largimi. Por edhe pas këtij vendimi, atyre nuk iu garantohet shtetësia amerikane.
Pas këtij vendimi, menjëherë ka reaguar presidenti Trump duke e quajtur këtë vendim të gjykatës si të tmerrshëm kundër Republikanëve dhe Konservatorëve.
Në shtatorin e vitit 2017, administrata Trump deklaroi se do të kërkonte që t’i jepte fund programit të ashtuquajtur DACA, që mbron të rinjtë imigrantë, që janë pa dokumente. Ky ishte edhe njëri ndër premtimet e Trump gjatë fushatës zgjedhore.
Administrata e Trump dhe Republikanët kanë argumentuar se ky urdhër ekzekutiv është i paligjshëm dhe se Kongresi duhet të miratojë një ligj për të formalizuar reformën për imigrimin.
Megjithatë, në vendimin e Gjykatës Supreme të SHBA-së thuhet se administrata Trump nuk kishte vepruar në mënyrë të duhur, kur ka tentuar që t’i japë fund këtij programi./Fjala.al/Ke.Ba
