Nga Bashkim Muça
1-Ka një rivalitet ndërmjet BE-së dhe SHBA-së lidhur me udhëheqjen e bisedimeve për një marrëveshje përfundimtare ndërmjet Kosovës dhe Serbisë. E xhelozuar nga protagonizmi amerikan për ndërmjetësimin e bisedimeve, Evropa nuk ia ka falur Hashim Thaçit “nxitimin” për ta përfunduar marrëveshjen në Shtëpinë e Bardhë.
Gjykata Speciale e Hagës për hetimin e krimeve të luftës në Kosovë, që paguhet nga BE-ja, ka bërë publike një aktakuzë (e përfolur prej kohësh) ndaj Hashim Thaçit dhe disa bashkëpunëtorëve të tij, vetëm tri ditë përpara fillimit të bisedimeve në Shtëpinë e Bardhë, duke shkatërruar kështu dialogun.
2-Kur flitet për luftën e UÇK-së në Kosovë duhen përmendur dy fakte që pranohen nga të gjithë:
Së pari, lufta e UÇK-së, kundër një shteti të huaj pushtues, ka qenë luftë e pastër çlirimtare.
Së dyti, UÇK-ja nuk ka pasur asnjë strategji apo orientim për vrasje civilësh, serbë, shqiptarë, apo komunitetesh të tjera.
3-Hashim Thaçi, ish-udhëheqësi politik i UÇK-së, dy herë kryeministër i zgjedhur dhe sot presidenti i Kosovës, është një nga figurat më emblematike të UÇK-së, njëkohësisht figura më e rëndësishme politike e shtetit të pavarur të Kosovës.
Sfida e Hashim Thaçit me Gjykatën e Hagës është sfida e Kosovës dhe e gjithë shqiptarëve me historinë. Ky rast nuk është për të bërë hajgare, aq me pak për t’u gëzuar disa, por për të lënë gjithçka tjetër mënjanë e për t’u bashkuar.
Lufta e UÇK-së është periudha më e lavdishme në historinë e popullit të Kosovës.
/En.Br./Fjala.al
