Afrimi i festave të fundvitit ka grishur politikanët më të lartë të vendit, të cilët duke u ndjerë si “baballarë të kombit”, të bëjnë urime publike për qytetarët, me qëllim përmirësimin e imazhit. Në këtë linjë edhe kryetarja e LSI-së, Monika Kryemadhi, ka shpërndarë një video, me anë të së cilës ndan urimet më të përzemërta për Vitin e Ri, për të gjithë shqiptarët.
Shefja e LSI-së ka edhe një mesazh origjinal për shqiptarët. Ajo shprehet se, në darkën e fundvitit, duhen konsumuar sa më shumë produkte shqiptare. Kryemadhi shprehet se, vetëm kështu do të mund t’i vinim në ndihmë fermerëve të Shqipërisë, që janë lënë pa subvencione e pa ndihmë nga kjo qeveri.
Ja edhe mesazhi i plotë në rrjetet sociale i kryetares së LSI-së, Monika Kryemadhi:
“?? BLENI SHQIP, KONSUMONI SHQIP, GËZONI SHQIP!
Të nderuar miq!
Në festat e fundvitit ashtu sikurse është traditë të gjithë do të shtrojnë tavolinën për darkën e festës. Ndajmë gëzimin, por edhe është momenti të mendojmë shumë më shumë për njëri-tjetrin, sepse kemi nevojë si asnjëherë më parë për njeri-tjetrin. Tavolina e festës duhet të jetë sa më shumë shqiptarë, ndaj të konsumojmë sa më shumë produkte shqiptare.
Produkte të shkëlqyera, që i prodhon djersa dhe mundi i papërshkrueshëm i mijëra shqiptarëve të lënë pas dore nga kjo qeveri, që i ka hequr çdo subvencion fermerëve dhe agropërpunuesve shqiptarë. Tashmë përmes një politike prej shërbëtorësh të interesave të oligarkëve qeveria kërkon që ti vendosë produktet shqiptare edhe përballë konkurrencës sa të pandershme aq edhe antikombëtare.
Konsumoni shqip, konsumoni frutat, zarzavatet, bulmetrat, verën, birrën, miellin shqiptar, në ndihmë të gjithë fermerëve dhe prodhuesve të shijes së mrekullueshme shqiptare që të mbështesim fort njëri-tjetrin edhe në këto ditë festash,ashtu siç gjendemi pranë në ditë të vështira.
Gëzuar Viti e Ri, jo vetëm me urimin shqip, por edhe me produktet unike shqiptare në tavolinat tona.
??Bleni shqip, konsumoni shqip, gëzoni shqip.
Gëzuar miq!??”,- mbyll postimin e saj në rrjet, shefja e LSI-së, Kryemadhi, duke e shoqëruar atë edhe me një Video./Fjala.al/
