Ditët e para të 2020 kanë shënuar një fluks në rritje të virozave të stinës. Mendohet se shkak kryesor janë ndryshimet e shpeshta të temperaturës, çka bën që të gjithë të jenë të rrezikuar për t’u prekur nga virozat e stinës, kryesisht moshat e mëdha dhe fëmijët.
Qendrat shëndetësore të kryeqytetit kanë pasur një dyndje vizitash tek mjeku pediatër.
Mjekja pediatre Donika Jorga në Qendrën Shëndetësore 8, thotë se kryesisht të prekurit kanë shfaqur probleme në rrugët e sipërme të frymëmarrjes dhe ato të poshtmet nga infeksionet, por edhe gastro-enteritet, megjithëse më të pakët në numër.
Mjekja këshillon prindërit të kontaktojnë për çdo problem shëndetësor me pediatrinë më të afërt dhe të mos marrin mjekime direkt nga farmacia.
Shefja e sëmundjeve infektive në ISHP Silva Bino, në një status në “Facebook”, tërheq vëmendjen duke deklaruar se virusi i gripit është në qarkullim dhe se kush nuk është vaksinuar duhet të shpejtojë. Ajo kujton masat parandaluese se higjenës së lartë, ajrosja e shtëpisë, teshtitja duke përdorur gropëzën e bërrylit si mbrojte dhe evitimi i mjediseve të mbyllura./Fjala.al
