Presidenti i Kosovës, Hashim Thaçi dhe kryetari i Lëvizjes Vetëvendosje, Albin Kurti thuhet se do të takohen nesër pak pas mesdite.
Të dhënat janë bërë publike nga mediet kosovare. Madje ato i referohen një reagimi të kreut të shtetit i cili lë të kuptohet edhe orarin e takimin me Albin Kurtin. Por ajo që është interesante përveç asaj që pritet të diskutohet në këtë takim, është fakti i lojës që po bëhet mes palëve.
Presidenti kërkohet t`i lihet LDK-së e për pasojë, Kurti kërkon një ministri që ‘ia ka marrë Isa Mustafa. Duket se shifrat që janë ngërthyer në 6 me 4 për LDK-në, për ministra, nuk e kënaqin liderin e ri të Kosovës, i cili vjen me të drejtën e fituesit. Po ashtu edhe Thaçi nuk shkon pa pretendime në këtë takim.
Ai ka thënë se: “Unë e mirëpres paktin që pas ftesës së tretë që zotëri Kurti i është përgjigjur ftesës për datën 6 janar në orën 15.00.
Do ta pres në zyrën time, nuk mund të sillemi as me hatër. Mirë se vjen, e mirëpres”, tha presidenti Thaçi, i cili ka shtuar se pret që në javët e para të janarit të arrihet një marrëveshje në mes partisë fituese dhe partnerit qeverisës, duke vënë kështu në vend vullnetin e qytetarëve.
Kurse Kurti, ditë më parë, ka thënë se do të takohet me Presidentin Thaçi, por ai nuk e përcakton datën e formimit të qeverisë.
“Mua vetëm LDK ma përcakton datën e formimit të qeverisë”- ka thënë ai. Përndryshe, para këtij takimi LDK do të mbaj dy mbledhje të rëndësishme, atë të kryesisë dhe të grupit parlamentar, e cila thuhet se do të jetë edhe lëvizja e fundit e LDK-së për të qartësuar qëndrimin e saj, karshi koalicionit me VV-në.
Mediat vendase kanë raportuar se VV tashmë i ka bërë një ofertë LDK-së, pas zgjedhjes së Glauk Konjufcës si kryetar të Kuvendit, duke i ofruar LDK-së të marrë gjashtë ministri, kundrejt katër sa duhet të kishte Lëvizja Vetëvendosje.
Ndërsa, në ofertë parashihet që presidenti t’i takojë LDK-së, dhe në momentin e zgjedhjes së këtij pozicioni, atëherë partia e Isa Mustafës t’ia kthejë një ministri VV-së, duke u barazuar 5 me 5 sa i përket ministrive. /Fjala.al/
