Albin Kurti i ka refuzuar presidentit Thaçi, dy ftesa brenda ditës. Por të hënën Presidenti i Kosovës pritet ta mandatojë Albin Kurtin si kryeministër.Disa letra radhazi janë shkëmbyes për t’u dakorduar për një takim.
Dhe kështu presidenti i Thaçi dhe kreu i Lëvizjes Vetëvendosje, Kurti, pritet që më në fund të takohen ditën e hënë.
Thaçi ka deklaruar se do ta presë fituesin e zgjedhjeve më 6 janar në zyrën e tij, duke ia caktuar orën 15:00.
Nga Lëvizja Vetëvendosje, për “T7” kanë konfirmuar se takimi mes Thaçit e Kurtit do të ndodhë ashtu siç ka theksuar edhe kreu i Vetëvendosjes, në letrën e dërguar presidenti.
“Në letrën e dërguar Presidentit, Kryetari Kurti ka theksuar se me datën 6 janar në orën në të cilën mundet presidenti, do të mund të takoheshin. Dhe po, nesër pritet të mbahet takimi”, kanë thënë Zyra për Shtyp e Vetëvendosjes.
Ndërkohë, një takim po aq i rëndësishëm do të zhvillohet të hënën në zyrat e Lidhjes Demokratike të Kosovës.
Fillimisht mblidhet kryesia e kësaj partie, e më pas edhe grupi parlamentar.
Gjithë këto takime po ndodhin pas zhvillimeve në seancën konstituive të fund vitit të kaluar, kur Glauk Konjufca u zgjodh kryetar kuvendi.
Lëvizja Vetëvendosje dhe Lidhja Demokratike e Kosovës, dolën të parat në zgjedhjet e 6 tetorit, ndërsa ende, as pas tre muajsh, nuk kanë arritur të merren vesh për një koalicion bashkë-qeverisës.
