Kryebashkiaku i Mallakastrës, Qerim Ismailaj ka reaguar pas akuzave të Partisë Demokratike, se ka qenë i dënuar në shtetin grek në vitin 1999.
Duke iu referuar shkresës që selia blu ka dërguar në prokurori për verifikimin e figurës së tij, Ismailaj ka theksuar se nuk ka qenë i ndaluar nga policia greke, dhe se ai është i hapur për çfarëdolloj verifikimi.
“Nuk kam asnjë lloj dijenie. Jam i hapur për çdo lloj verifikimi të mundshëm. Unë punoj si kryetar, kam dorëzuar formularin e dekriminializimit. Nuk jam ndaluar nga policia greke, në asnjë rast”, deklaroi Ismailaj.
Dy javë më parë Ismailaj ka vizituar shtetin grek. I pyetur nga gazetarët nëse vizita e tij ka lidhje me këtë akuzë, ai tha se ka qenë tek motra për sebepe familjare.
“Unë kam motrën në Greqi, ka pasur sebepet e veta familjare, ky është shkaku”, u shpreh Ismailaj.
Ismailaj foli për mediat, teksa doli nga familja e 51-vjeçares Drita Saliaj, e cila u vra nga nipi i burrit dhe dy shokët e tij, teksa është njoftuar se PD e ka denoncuar si person të dënuar në shtetin grek. Ai tha se është i hapur për çdo verifikim./Fjala.al/
