Tensionet midis Shteteve të Bashkuara të Amerikës dhe Iranit, kanë ngritur në alarm edhe vetë Aleancën e Atlantikut të Veriut.
Kjo e fundit i është përgjigjur ftesës së presidentit amerikan Donald Trump, për t’u përfshirë më shumë në Lindjen e Mesme.
Duke folur për këtë situatë, gjenerali i NATO-s, Michael Barbero zhvilloi një takim pune me një grup deputetësh dhe ish-deputetësh shqiptarë në Tiranë.
Sipas gjeneralit të NATO-s, Michael Barbero, nuk është aspak e vërtetë që Shtetet e Bashkuara të Amerikës kërkojnë të pushtojnë Iranin. Vrasja e gjeneral Sulejmanit, sipas Barberos ishte parandalim për sulme të mëtejshme të Iranit ndaj amerikanëve.
“Nuk është e vërtetë që SHBA kërkon të pushtojë Iranin. Vrasja e gjeneralit Soleimani ishte një parandalim. Irani ka organizuar disa sulme të sofistikuara, nuk kishte përgjigje nga ne. Kemi ndërmarrë veprimet e nevojshme për të mbrojtur njerëzit tanë. Marrëveshja bërthamore me Iranin nuk ishte e mirë, duhet të negociojmë një tjetër.”
Para disa vitesh, gjenerali Barbero ka pasur nën komandë trupat shqiptare në Irak.
