Inxhinieri elektrik i Spitalit të Durrësit, Edmond Palodhi ka treguar shkaqet e flakëve që përfshinë spitalin e këtij qyteti.
Ai është shprehur se flakët nuk kanë qenë të mëdha dhe se ka pasur më tepër tym dhe ndotje të ajrit nga djegia e kabllove.
“Zjarri ka rënë nga ngarkesa në rrjetin elektrik për shkak të stinës dhe ngrohëseve në ambientet e spitalit.
Zjarri si fillim ka rënë në katin e parë tek pavijoni i neurologjisë dhe më pas, meqenëse janë me një kolonë të gjithë katet e rrjetit, ka avancuar në kat të dytë, të tretë dhe të katërt.
Për evakuimin e të sëmurëve është vepruar në mënyrë të shpejt nga personeli për arsye se janë edhe shkallët e emergjencës dhe zjarri nuk ishte i përmasave të mëdha. Ishte thjesht tym dhe ndotja e ajrit nga djegia e elementëve që përbëjnë kabujt elektrik”, shprehet inxhinieri për Report Tv.
I pyetur se nëse kërkon kohë rregullimi i dëmeve, inxhinieri elektrik i Spitalit të Durrësit përgjigjet se: “Po, kërkon kohë riparimi i dëmeve sepse janë gjithsej katër kate. Po ashtu duhen ndryshuar panelet sepse janë djegur, janë të këputura”.
