Redaksionale
Në qytetin gjerman të Maincit, afro 600 vite më parë, nisi punën shtypshkronja e parë në botë, shtypshkronja e Gutenbergut, duke printuar librat e më tej gazetat në formatin që njohim ende sot. Pas 6 shekujsh rezistencë, vetëm në dy dekadat e fundit ekzistenca e letrës së printuar u vu në pikëpyetje të forta përballë revolucionit digjital, duke na e sjellë librin dhe gazetën në një ekran kompjuteri apo telefoni pa qenë nevoja të kalojë në lastrat e shtypit dhe pa e ndier erën e plumbit që thahet në letër.
Gazetat më të mëdha në botë e vunë në diskutim ekzistencën e tyre tradicionale në print, duke iu përshtatur epokës së re. Por, pavarësisht parashikimeve, “vdekja e Gutenbergut” nuk është përfundimtare, për sa kohë do të ketë akoma lexues që e duan dhe i besojnë lidhjes së prekshme me gazetën dhe librin.
Botimi i një gazete print sot është kthyer në një përpjekje donkishoteske për botuesit dhe gazetarët. Për të parët, për shkak të kostove financiare që mbart krahasimisht me median online, dhe për të dytët, për shkak të humbjes së ekskluzivitetit të lajmit të fundit, i cili konsumohet në kohë reale në televizion dhe portalet online.
Gazeta “Fjala” del sot në print në numrin e saj të parë, duke i besuar lexuesit dhe gazetarisë profesioniste dhe duke marrë përsipër riskun e “betejës” me detin e madh të informacionit online. “Fjala” sot vjen si një besëlidhje e re me lexuesin, me shpresën e vazhdimësisë në një moment të vështirë për printin, kur disa gazeta të vjetra në treg janë mbyllur ose janë drejt mbylljes.
Beteja më e fortë që e pret “Fjalën” është beteja me lirinë dhe profesionalizmin.
Liria e shtypit në Shqipëri, sipas indeksit të “Reporterëve pa Kufij”, është në fashën portokalli, që nënkupton “situatë problematike”, një fashë ku gjenden sot 37% e vendeve në botë, përfshirë dhe SHBA-në. Një ligj i ri i miratuar nga mazhoranca jep sinjale për përkeqësimin e kësaj situate dhe është kundërshtuar fort nga shoqatat e gazetarëve në vend dhe ato ndërkombëtare. Edhe pa këtë ligj media shqiptare kishte problematikat e saj të vjetra të profesionalizmit, të censurës dhe autocensurës që rrjedhin nga lidhjet e interesave të pronarëve të medias me politikën.
Por, pavarësisht nga problemet, gazetarët që kanë punuar për të vërtetën e kanë gjetur gjithmonë kanalin e tyre të komunikimit me publikun. Ekipi i ri i gazetës “Fjala” beson te liria e shprehjes dhe do të angazhohet t’i shërbejë lexuesit, pasi nuk mund të ketë liri të mendimit pa njohur realitetin ku jetojmë. Për të cituar nenin 19 të Deklaratës Universale të të Drejtave të Njeriut: “liria e mendimit dhe e shprehjes” nënkupton të drejtën “e kërkimit, marrjes dhe shpërndarjes së informacionit dhe ideve përmes çdo medie dhe pavarësisht nga kufijtë”.
Profesionalizmi do të jetë kryefjala jonë. Për një sipërmarrje të guximshme, kur shumë media print (gazeta të përditshme), po bien njëra pas tjetrës nën siglën “Mbyllet” ne besojmë, duke ardhur pranë lexuesit më shkrime të thelluara, analiza përtej së sotmes dhe në ruajtje të parimeve kryesore të gazetarisë; të vërtetën dhe paanshmërinë.
Në këtë drejtim, “Fjala” do të punojë që të ketë fjalët e duhura, fjalët e vërteta, pa u shqetësuar që të bëjë marrëveshje shitblerjeje apo censure për fjalët. “Fjala” do të jetë e vërtetë! “Fjala” do të jetë e lirë!/Fjala.al
Çdo botim të Gazetës Fjala në PDF do e gjeni falas në këtë link
