Abortet në vendin tonë kanë pësuar rënie nga viti në vit, por çudia më e madhe vjen nga statistikat në rang qarqesh. Vlora renditet e para në bazë të përllogaritjeve për një mijë lindje, me plot 274 aborte, ndërsa në vendin e dytë mbetet Berati me Tiranën që janë thuajse në të njëjtat shifra.
Është INSTAT që ka publikuar të dhënat e Institutit të Shëndetit Publik ku saktëson se qarqet e Vlorës, Beratit dhe Tiranës kanë numrin më të lartë të aborteve në raport me numrin e lindjeve të gjalla më 2017, pasi gati 25 % e shtatzënive janë ndërprerë.
Sipas tyre në Vlorë u shënuan 274 aborte për 1000 lindje, ndërsa Berati u rendit i dyti për numrin e lartë të aborteve, pasi në vitin 2017 rezultuan 231 aborte për 1000 lindje. Po ashtu edhe në Tiranë numri i aborteve gjithashtu ishte i lartë, pasi ka rezultuar 231 ndërprerje shtatzënie për 1000 lindje.
Ndërsa në krahun tjetër, numri më i ulët i aborteve ka qenë në qarkun e Kukësit. Ka rezultuar vetëm 54 aborte për 1000 lindje, gjithashtu në Elbasan ishin vetëm 55 aborte për 1000 lindje.
Në qarqet e Korçës, Dibrës dhe Shkodrës numri i aborteve ishte më i ulët se mesatarja kombëtare. Në vitin 2017 në shkallë kombëtare numri i aborteve ishte 171 për 1000 lindje. Në 5 vitet e fundit, vihet re një ulje e ndjeshme e lindjeve, shoqëruar dhe me ulje të numrit të aborteve gjithsej.
Në vitin 2017, raporti i numrit të lindjeve me abortet është 1 abort në 5.8 lindje. Raporti i abortit është indikator që ka pësuar rënie me rreth 15 %, krahasuar me vitin 2013.
Megjithatë sipas shifrave të INSTAT shihet një tendencë lindjesh në rritje kryesisht në Tiranë ku edhe është popullsia më e madhe në vend. n.k/Fjala.al/
