Shqipëria nuk po gjen qetësi nga tërmetet. Një lëkundje e fortë me magnitudë 4.5 është ndjerë në Fushë-Krujë dhe në Durrës, ku epiqendra e tërmetit ka qenë në Hamallaj.
Është e njëjta epiqendër nga e cila erdhi edhe tërmeti i para pak ditëve që shkundi Durrësin dhe Tiranën dhe krijoi panik te banorët të cilët lanë shtëpitë dhe dolën në rrugë.
Ndërkohë që sizmologu Rrapo Ormeni shprehet se nuk ka vend për panik dhe frikë, pasi janë pas lëkundje pas tërmetit të 26 Nëntorit.
“Tërmeti ka qenë në vijim të pasgoditjeve të tërmetit të 26 nëntorit. Është me magnitudë 4 me epiqendër në fshatin Safetaj të Durrësit. Një lëkundje normale. Edhe pas tërmetit para 3 ditësh ky është shumë i vogël, por në vazhdën e atyre pasgoditjeve që po vijojnë pas tërmetit të madh. Shpejtësia e tyre ka ardhur duke u ulur në krahasimin me muajt e parë. Aktiviteti sizmik është i lartë, pasi në 40 vitet e fundit ka qenë i ulët” tha ai.
