Ndeshjet Bylis-Vllaznia dhe Laç-Skënderbeu kanë mbyllur javën e 20-të të Kategorisë Superiore.
Këto dy ndeshje u luajtën ditën e sotme, ndërsa tre takimet e tjera u mbyllën në fundjavë. Takimi midis Bylisit dhe Vllaznisë është mbyllur në paqe me barazimin 2-2, duke u ndarë me nga një pikë secila.
Saga e golave u startua nga Renato Malota për ekipin e Vllaznisë që në minutën e 2-të të lojës, ndërsa vetëm një minutë më pas lojtarët e Ballshit kanë arritur që të barazojnë rezultatin me anë të Valentino Muratajt. Ndërsa në minutën e 7-të të lojës do të ishin sërish këta të fundit që do të shënonin, ku Edison Ndreca mundi që të dyfishonte rezultatin për skuadrën e tij. Sfida vazhdoi me këto shifra deri afër fundit të pjesës së parë, ku Gilman Lika shënoi në minutën e 44-të për shkodranët.
Fraksioni i dytë i lojës pati po ashtu një sërë rastesh për të shënuar, por që nuk u finalizuan. Ky takim u mbyll me barazim dhe aktualisht Bylisi renditet në vend të katërt, ndërsa Vllaznia vazhdon të qëndrojë e 7-ta.
Takimi midis Laçit dhe Skënderbeut, në ndryshim nga ndeshja tjetër u mbyll me një fitues. Kurbinasit arritën që të merrnin tre pikët në shtëpi duke kaluar kështu në vendin e 3-të të kategorisë, ndërsa korçarët vazhdojnë të mbeten në vend të tetë. Pjesa e parë e këtij takimi u mbyll me barazimin 0-0, ku pavarësisht rasteve asnjëra prej skuadrave nuk mundi të shënonte.
Duhej të vinte minuta e 52-të e lojës që skuadra e Laçit të mund të shënonte golin e parë dhe të vetëm të saj për këtë ndeshje me anë të Redon Xhixhës.
Java e 21-të e Superligës do të zhvillohet po ashtu në dy ditë, midis datës 7 dhe 8 shkurt.
Ndeshjet dhe oraret e javës së 21-të:
Vllaznia-Tirana 07/02/2020 ora 18:00
Skënderbeu-Bylis 08/02/2020 ora 14:00
Kukësi-Laç 08/02/2020 ora 14:00
Partizani-Flamurtari 08/02/2020 ora 17:00
Teuta-Luftëtari 08/02/2020 ora 17:00/Fjala.al/
