Një lajm fake po qarkullon në media ku pretendohet se ka vdekur shkrimtari i njohur Ismail Kadare. Ky lajm ka qenë vetëm pjesë e një sulmi kibernetik që i është bërë ministres së re të Kulturës, Rinisë dhe Sportit, të Kosovës, Vlora Dumoshi.
Konkretisht ka qenë një adresë në Twitter, e cila mban identitetin e ministres, që ka shpërndarë lajmin se shkrimtari Kadare ka ndërruar jetë.
Postimi i saj u shpërnda gjerësisht në rrjetet sociale, ndërsa në një prej statuseve, në gjuhën angleze, në këtë faqe thuhej se lajmi mbi vdekjen e Kadaresë konfirmohej dhe nga ministrja e Kulturës.
Ministrja Dumoshi ka reaguar në profilin e saj në ‘Facebook’, ku ka thënë se ajo nuk ka asnjë llogari në Twitter.
“Sapo u njoftova se dikush ka hapur një llogari të rrejshme në emër timin në rrjetin social Twitter dhe të njëjtën e ka keqpërdorur, duke lëshuar lajme të rrejshme -fake news. Dua të ju informoj se unë nuk kam asnjë llogari në Twitter. Menjëherë do ta paraqes rastin në Policinë e Kosovës, departamentin e krimeve kibernetike. Dëshiroj të shpreh keqardhjen time për këdo që mund të jetë trazuar nga këto lajme të rrejshme, duke keqpërdorur emrin tim”, ka shkruar Dumoshi./Fjala.al
