Xhevdet Troplinit, pronar i kompanisë “Euromag” në Durrës, i është dorëzuar sot formulari për deklarimin e pasurisë. “Operacioni Forca e Ligjit” i ka dorëzuar formularin Troplinit për shkak se është i dënuar për trafikim të lëndëve narkotike.
Ai ka 48 orë për t’ju përgjigjur pyetjeve të bëra nga OFL.
Emri i Xhevdet Troplinit u bë i njohur në media në vitin 2016-ës, pasi rezultoi se ai ishte një nga personat që ishte gjobitur nga Emiljano Shullazi.
Formulari i OFL i dërgohet sot Dritan Dajtit, ka 48 orë kohë
Njoftimi i policisë
Në zbatim të detyrave të përcaktuara në Aktin Normativ të datës 31 janar 2020, vijon operacioni Forca e Ligjit, për dërgimin e kërkesave për vetëdeklarim të pasurisë, si dhe për sekuestrimin e pasurisë në kushtet e emergjencës.
Në këtë kuadër, OFL u ka dërguar kërkesat për vetëdeklarim të pasurisë shtetasve:
– D. D., me banim në Tiranë, i dënuar për veprat penale: “Vrasja në rrethana të tjera cilësuese”, “Mbajtja pa leje e armëve luftarake”, “Falsifikimi i dokumenteve”, “Falsifikimi i vulave, stampave ose i formularëve” dhe “Mbajtja pa të drejtë e uniformës”;
– Xh. T, me banim në Durrës, i dënuar për trafikim të lëndëve narkotike.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së.
Më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse, për të evidentuar dhe dërguar në SPAK, të gjithë personat që janë subjekt i Ligjit Special.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
