Duket se skuadra e Barcelonës i ka hedhur sytë nga lojtarët e Kombëtares Shqiptare të Futbollit.
Pas marrjes së Rey Manajt në merkaton e janarit tashmë katalanasit janë duke vëzhguar lojtarin e shumëpërfolur të Serisë A, Marash Kumbullën.
20-vjeçari shqiptar është duke zhvilluar një sezon pothuajse perfekt në Serie A me Hellas Verona, duke u bërë kështu një nga zbulimet më të mëdha të këtij sezoni në Itali.
Performanca fantastike e shqiptarit ka bërë që në gjurmët e tij të vihen skuadra të mëdha si Interi, Juventusi dhe Napoli në Itali, por edhe nga kampionatet e tjera. Garës për të marrë shërbimet e Kumbullës tashmë i është shtuar edhe Barcelona.
“TuttoHellasVerona”, raporton se katalanasit po e ndjekin me kujdes mbrojtësin. Më tej raportohet se spanjollët janë në kërkim të një lojtari për repartin e prapavijës, duke ditur se edhe Pique është në një moshë të madhe dhe Umtiti po tregon një formë të dobët.
Madje shtohet se Barcelona dëshiron ta marrë menjëherë në ekip Kumbullën, në mënyrë që ai të mësohet me lojën e katalanasve përkrahë Pique-së./Fjala.al/
