Etila Gjonaj, ministre e Drejtësisë, ka thyer heshtjen pas kallëzimit që i bëri presidenti Ilir Meta në Prokurorinë e Posaçme SPAK. Presidenti Meta e akuzon ministren se është bërë pjesë e asaj që e quan “grusht shteti për kapjen e Gjykatës Kushtetuese”.
I duhej lënë Presidentit koha, tha Gjonaj, për të ezauruar seritë e spektaklit për “grupin armiqësor” dhe kriminal në Ministrinë e Drejtësisë. Ajo theksoi se nuk i përgjigjet “fjalëve të padenja të Presidentit”, por e akuzoi se ka krijuar një kauzë fiktive në funksion të kauzave politike sa i përket pretendimit të tij se mazhoranca socialiste është përpjekur t’i rrëmbejë të drejtën për të emëruar anëtarin në Gjykatën Kushtetuese.
Parashikimet ligjore për përzgjedhjen e anëtarëve të Kushtetueses janë të qarta, shtoi ministrja.
“Presidenti ka krijuar këtë kauzë fiktive në funksion të betejave të tij që s’janë në përputhje me interesat e tij kushetuese në momentin më të rëndësishëm që po kalon Shqipëria, në prag të negociatave”, tha ndër të tjera Gjonaj.
Thirrjet e Ilir Metës për protestë më 2 mars, Etilda Gjonaj i konsideroi të dëshpëruara.
Sa i përket akuzës së bërë në SPAK, Gjonaj u shpreh: “Rezervoj të drejtën për të mos dhënë asnjë koment në respekt të ligjit dhe institucioneve të reja të drejtësisë.”
