Derbi Tirana-Partizani ngre siparin e javës së 24-t të të Kategorisë Superiore, në një sfidë që shikohet si më e rëndësishmja.
Bardheblutë do të presin sonte në orën 19:00 të kuqtë e Partizanit dhe pritet të jetë një ndeshje plot emocion. Deri më tani raportohet që stadiumi të jetë mbushur pothuajse plot dhe të kenë mbetur shumë pak bileta të pashitura.
Të dyja skuadrat dhe tifozeritë e tyre presin me padurim këtë takim, ndërsa nga polica janë bërë një sërë paralajmërimesh për të mbajtur qetësi dhe të mos krijohen trazira. Duke parë ecurinë e javëve të fundit të të dyja ekipeve si dhe mungesat që ata kanë, Tirana shihet si pretendentja e këtij takim.
Bardheblutë janë pothuajse të plotë në këtë takim dhe vetëm pjesëmarrja e Agustin Torrasas është në diskutim, ndërsa Partizani do ketë mungesat e titullarit kryesor, Lorenc Trashi pasi u dëmtua gjatë ndeshjes me Bylisin e nuk është në gjendje.
Ndonëse duket qartazi se Tirana është favorit i këtij takimi surprizat janë gjithmonë të pranishme në ndeshjet e Superligë.
Ndërsa ditën e shtunë, më 29 shkurt do të mbahen katër takimet e tjera të Superligës, nga ku Bylisi do tentojë me çdo kusht të marrë fitoren nga Flamurtari në orën 14:00, Vllaznia do përballet me Skënderbeun në të njëjtën orë në një takim që deri diku shihet në nivele të barabarta.
Luftëtari do të ndodhet para sfidës me Laçin në ndeshjen që do zhvillohet po në orën 14:00 dhe ku duket se kurbinasit janë favoritë. Ndërsa takimi i fundit është ai midis Teutës dhe Kukësit, nga ku verilindorët do tentojnë të marrin fitore për të dalë sërish në krye të kampionatit dhe në të njëjtën kohë shpresojnë për një humbje ose barazim të Tiranës në takimin e sotëm.
Oraret e takimeve, java e 24-t e Superligës:
Tirana-Partizani 28 shkurt ora 19:00
Bylis-Flamurtari 29 shkurt ora 14:00
Vllaznia-Skënderbeu 29 shkurt 14:00
Luftëtari-Laçi 29 shkurt ora 14:00
Teuta-Kukësi 29 shkurt ora 17:00./Fjala.al/Katerina Tafa/
