Publikimi i fotove nga Shqiptarja.com ku shfaqet presidenti Ilir Meta në krah të dy trafikantëve të drogës Xhevdet Troplini dhe Altin Hajri, kanë sjellë reagimin e biznesmenit Leonard Koka. Një mesazh i është dërguar në ‘ëhats app’ botuesit të Shqiptarja.com, Carlo Bollino, i cili thotë se po shantazhohet dhe po kërcënohet nga Koka.
“Ty Karlo që ke nxjerrë fytyrën time aty me Ilir Metën, po të them që ajo është ditëlindja e Lefter Kokës, vëllait tim. Teri bën nga 10 ditëlindje në vit. Kujdes se do dali edhe b… jote nga Shijaku që ke marrë për gru te ditëlindjet e Terit, që ka hyrë e dalë 100 herë tek hoteli i Hajrave. Unë kam foto shumë Karlo, për ty dhe për ata që të paguajnë ty”, thuhet në mesazhin që Koka i dërgon Bollinos.
Ndërkohë, në Shqiptarja.com shkruhet për këtë mesazh: “Leonard Koka, vëllai i ish-deputetit të LSI, Lefter Koka kërcënon botuesin Carlo Bollino pas publikimit të fotove që tregojnë presidentin e republikës Ilir Meta, i cili në vitin 2017 tashmë president i emëruar, merr pjesë në një darkë në krah të dy trafikantëve të drogës Xhevdet Troplini dhe Altin Hajri. Koka, në vend që të shpjegojë arsyet e pranisë së tij dhe të vëllait të tij Lefterit dhe te Kreut te Shtetit në krah të trafikantëve, kërcënon dhe shantazhon të publikojë foto imagjinare që tregon Carlo Bollinon në restorant në Shijak të familjes Hajri.”
