75-vjeçarja, e cila po kurohej në qytetin e Durrësit për koronavirus, dyshohet se mund të ketë infektuar 30 mjekë dhe infermierë, por edhe pacientë të tjerë.
E moshuara ishte shtruar në Spitalin e Durrësit që prej datës 3 mars pasi kishte probleme të rënda me rrugët respiratorë. Gruaja kishte udhëtuar nga Bolonja, kishte zbritur në aeroportin e Rinasit dhe më pas drejt qytetit të Durrësit, por këtë fakt ajo ia kishte mbajtur të fshehtë mjekëve.
Pas 3 ditësh qëndrimi në Shqipëri e moshuara ishte ndjerë keq dhe kishte shkuar në spital për të marrë kurimin për pneumoni, por pas një jave gjendja e saj shëndetësore u përkeqësua.
Që prej momentit që e moshuara është paraqitur në ambientet e spitalit asaj i kanë shërbyer rreth 30 mjekë dhe infermierë. Vetëm ditën e djeshme analiza e bërë nga ISHP-ja tregoi që e moshuara ishte pozitive ndaj koronavirusit, Covid-19. Aktualisht e moshuara ndodhet e izoluar në reanimacion.
Por pas konfirmimit pozitiv të gruas, të gjithë mjekët dhe infermierët që kanë pasur kontakt me të janë duke pritur në ankth përgjigjen e rezultateve. Ndërkohë që e moshuara është vizituar edhe nga shumë familjarë të saj, raporton “BW”.