Ndërsa në Shqipëri është duke u shtuar numri i të prekurve me koronavirusin e ri, Covid-19, ekipi i fondit monetarë ndërkombëtar ka diskutuar në distancë me autoritetet shqiptare.
FMN ka publikuar deklaratën në të cilën thotë se ekonomia e Shqipërisë do të ngadalësohet si pasojë e Covid-19, por ajo thotë se është herët për të pasur vlerësime në shifra se sa do të jet shkalla e ngadalësimit.
“Perspektiva afatshkurtër për ekonominë shqiptare ka ndryshuar në tre muajt e fundit. Për më tepër, shpërthimi i fundit global i koronavirusit (COVID-19) pritet të ngadalësojë rritjen ekonomike më tej në vitin 2020.Shkalla e ngadalësimit është tejet e paqartë në këtë moment,do të jenë të nevojshme politika për të mbrojtur njerëzit gjatë shpërthimit të COVID-19 duke siguruar që sektori shëndetësor të ketë burime të mjaftueshme dhe duke mbështetur më të prekurit”
Covid-19 eshte goditja e dytë që merr ekonomia shqiptare pas tërmetit të 26 nëntorit. Fondi Monetarë Ndërkombëtarë deklaronë se është e rëndësishme që projektet e rindërtimit të jenë sa më transparente.
“Do të jetë e rëndësishme të sigurohet që projektet e rindërtimit të administrohen në mënyrë transparente, në përputhje me praktikat më të mira ndërkombëtare, dhe të kenë përparësi më të rrezikuarit”.
Fondi Monetar Ndërkombëtar kërkon të bëhet kujdes me amnistinë fiskale.FMN thotë se programe të tilla krijojnë favore fiskale për përfituesit kundrejt atyre që kanë paguar taksat rregullisht. Për më tepër fillimisht duhet të krijohen sisteme efektive për të zbuluar evazionin dhe për të parandaluar mundësitë për pastrim parash dhe korrupsion.
