Pavarësisht masave dhe thirrje nga qeveria për t’u mbrojtur nga koronavirusi dhe për të shmangur daljet në publik, ka nga ata që e kanë sfiduar këtë apel duke dalë edhe në ambiente ku grumbullohen njerëzit, siç janë edhe tregjet e qyteteve.
Një rast i tillë vjen nga qyteti i Shkodrës, ku një grua e moshuar, që i përket edhe kategorisë që preket më shumë nga koronavirusi thotë se nuk ka aspak frikë nga Covid-19.
Madje sipas saj, thirrja e qeverisë që njerëzit të izolohen në shtëpi është një apel krejt i gabuar.
Sipas qytetares, koronavirusi prek vetëm njerëzit e këqij dhe jo shkodranët të cilët sipas saj janë njerëz të fortë dhe malësorë.
“Për çfarë me pas frikë. Ne shkodranët jemi gur, jemi malësorë, racë e fortë. Koronavirusi iu bie atyre që janë të liq, dhe kanë bërë gurgule, kanë mbyllur njerëzit brenda. As mos kini hiç frikë prej kësaj pune. Unë s’kam frikë hiç”, shprehet qytetarja për mediat lokale.
Ndërkaq, numri i të prekurve nga koronavirusi deri më tani në Shqipëri ka arritur në 42, ndërsa ka humbur jetën vetëm 71-vjeçare në spitalin e Durrësit disa ditë më parë pasi ishte kthyer nga Italia./Fjala.al/
