Kur Shqipëria ka shënuar sot viktimën e saj të dytë nga koronavirusi, pas të moshuarës 73-vjeçare, e cila ndërroi jetë pasi ishte kthyer nga Italia, dhe kur vendi gjendet i gjithi në karantinë, në maternitetin ‘Mbretëresha Geraldinë’ ka ardhur në jetë një foshnje.
Kryeministri Rama ka publikuar një video nga materniteti ku shfaqen mjekët dhe infermierët, të pajisur me maska, të cilët iu shërbejnë nënave dhe foshnjave të tyre.
“MIRËMËNGJES uroj një ditë të lehtë për ju të gjithë me pamjet frymëzuese të spitalit ku lind jeta”, shprehet Rama.
Kjo është një pamje tjetër e asaj çfarë jemi mësuar të shohim deri më tani, kur nga njëra koronavirusi vret te Infektivi, nga ana tjetër lindin foshnje në maternitete. Një betejë mes jetës dhe vdekjes, ku gjendet e gjitha bota sot.
Në Shqipëri me humbjen e jetës së 66-vjeçarit bilanci është rënduar duke e çuar në 2 numrin e vdekjeve nga koronavirusi pas 73-vjeçares nga Durrësi e cila sapo ishte kthyer nga Italia, vendi i cili është më prekuri në Evropë nga koronavirusi.
