Mjekët në Siatëll, janë detyruar t`i bëjnë vetë maskat mbrojtëse me çarçafë, si pasojë e mungesës së vaisjeve bazë për mbrojtjen nga koronavirusi në të gjithë botën. Kjo situatë ka prekur edhe Uashingtonin, vendi ku është përqendruar më shumë pandemia e koronavirusit në Shtetet e Bashkuara.
Të gjendur në këtë situatë, stafi i spitalit u mblodh në një dhomë konferencash në jug të Siatëllit për të bërë maska shtëpiake për mjekët, infermierët dhe profesionistët e tjerë të kujdesit shëndetësor, që gjenden në vijën e parë në përballje me epideminë e koronavirusit.
“Na mbeten edhe pak ditë, derisa të na mbarojnë pajisjet e nevojshme”-thotë Melisa Tajzën, zëvendëspresidente e asociuar e “Providence St. Joseph Health”, që drejton 51 spitale në 5 shtete perëndimore. “Ne po presim që të na vijnë paisje të tjera, por deri atëherë do të na duhet të improvizojmë”- thekson ajo.
Rastet me koronavirus në SHBA, e kanë tejkaluar shifrën 13.000, dhe përballë kësaj situate punonjësit e kujdesit shëndetësor pos hasin vështirësi jo vetëm në gjetjen e maskave, por edhe të veshjeve kirurgjikale dhe mjeteve mbrojtëse për sytë.
Presidenti Donald Trump, përgjatë një konference për shtyp në Shtëpinë e Bardhë, foli edhe për mungesën e pajisjeve mjeksore, duke deklaruar se “miliona maska” janë duke u prodhuar, por nuk pa dhënë detaje të tjera.
“Ne kemi ndihmuar deri tani shumë njerëz, dhe aktualisht po prodhohen miliona maska. Qeveritë lokale, guvernatorët dhe njerëzit brenda shteteve, duhet të bëjnë kujdes me mënyrën sesi ato po shpërndahen. Jam i sigurt se ata do t’a kenë parasysh këtë, duke e bërë shumë mirë punën e tyre”- theksoi presidenti.
Por kur një gazetar e pyeti pse spitalet janë aktualisht pa maska, në kushtet kur prodhimi i tyre është intensifikuar, Trump tha se sistemi mjekësor është “i vjetëruar”, dhe se sistemi i prodhimit “nuk e kishte parashikuar këtë situatë emergjence”.
“Askush nuk mund t’a dinte se do vinte një pandemi apo epidemi me përmasa të tilla. Askush nuk kishte parë më parë një situatë të tillë”- deklaroi ai. Duke folur për të njëjtën çështje zëvendëspresidenti Majk Pens tha:”Ne kemi rritur furnizimet me maska mjekësore, dhe do të vazhdojmë t’i japim prioritet prodhimit të maskave, duke u bërë thirrje të gjitha industrive të prodhimit të çfarëdolloj niveli”.
Ndërkohë, shumë spitale në shtetet e tjera të SHBA-së u kanë bërë thirrje urgjente kompanive private që të dhurojnë maska për fytyrën dhe mjete të tjera mjekësore, që shërbejnë për t’u mbrojtur nga infektimi. Shërbimet shëndetësore në Ilinois, u bënë thirrje të enjten kompanive të ndërtimit, dentistëve, veterinerëve, që t’u vijnë në ndihmë 200 spitaleve që ndodhen atje, me anë të dhurimit të maskave, të quajtura N95s.
“Spitalet në të gjithë shtetin mund të rrezikohen, pasi mund t’u mbarojnë të gjitha rezervat me pajisjet mjekësore mbrojtëse të domosdoshme”- tha presidenti i shoqatave mjekësore A.J Vilhelm./ S.T
