Një nxënës 13 vjeçar është viktima më e re në Britaninë e Madhe nga koronavirusi. Bëhet fjalë për Ismail Mohamed Abdulwahab, nga Brixton, për të cilin mediat britanike raportojnë se ka ndërruar jetën në Kings College Hospital, ditën e djeshme.
Familjarët thonë se janë të shkatërruar për ngjarjen dhe deklarojnë se nuk dinin ndonjë sëmundje të fshehur të djalit, e cila mund të ketë përshpejtuar gjendjen e rëndë pas prekjes nga koronavirusi. Autoritetet janë duke kryer autopsinë për të mësuar më shumë mbi rastin.
Vdekjet e fëmijëve dhe të rinjve nga COVID-19 janë një ngjarje e rallë, por ashtu siç kanë theksuar mjekë të shumtë, askush nuk është imun ndaj këtij virusi. Gjithsesi, koronavirusi kalohet nga shumica e fëmijëve pa probleme të forta.
25,474 është numri i personave të infektuar në Britani, ndërsa personat që kanë humbur jetën janë 1789.
