Londra është shtëpia e 1/3 së popullsisë së Mbretërisë së Bashkuar dhe sipas një studimi të ‘Imperial College London’, të paktën 1 në 15 londinezë mund të jetë i infektuar me COVID-19.
Studiuesit kanë përllogaritur që mesatarisht 2.7% e popullsisë së vendit mund të jetë infektuar me COVID-19 që prej 28 marsit. Bazuar në popullsinë e Londrës, e përbërë prej 8.9 milionë banorë, si dhe duke patur parasysh që 1/3 e rasteve të konfirmuara janë në Londër, rezulton që 600,000 londinezë mund të jenë infektuar me COVID-19.
Politika e kryeministrit Johnson për të testuar vetëm pacientët në gjendje të rëndë edhe ata më vulnerabël, si shtëpitë e pensionistëve, ka sjellë një lumë kritikash. Ajo çfarë ka nervozuar edhe më tej britanikët është se Johnson pranoi më herët se janë testuar vetëm 2,000 nga 500,000 punonjës të shërbimit shëndetësor, të cilët janë në vijë të parë të kësaj lufte.
Pavarësisht premtimeve të ministrave për të rritur numrin e testimeve progresi deri më tani ka qenë i ngadaltë. Shumë shkencëtarë bien dakort që testimi masiv është kryesor në luftën kundër përhapjes së virusit.
Kjo sepse shumë individë të infektuar shfaqin pak ose aspak simptoma dhe si rrjedhojë e përhapin tek të tjerët.
Vetë kreu i Organizatës Botërore të Shëndetit, Tedros Adhanhom, ka deklaruar disa herë se mesazhi më i rëndësishëm për vendet e prekura është, “testoni, testoni, testoni.”
