Në kohën e koronavirusit, trafikantët fshehën kokainën në kutitë e maskave
Edhe në kohë koronavirusi trafikantët e drogës nuk e ndalin aktivitetin e tyre. Përkundrazi ata gjejnë zgjidhje të zgjuara për të fshehur drogën e tyre.
Nga mediat e huaja mësohet se 14 kilogramë kokainë janë kapur në Britaninë e Madhe. Raportohet se droga e cila në treg kap vlerën prej 1 milion paund, u gjet e ndarë në 15 pako brenda një furgoni që drejtohej nga shofer polak, i cili po tenonte të hynte në Angli përmes tunelit të quajtur “Channel” që lidh Britaninë e Madhe me Francën. Droga ishte fshehur në furgon brenda disa pakove me maska, këto të fundit përdoren për t’u mbojtur nga COVID-19. Policia ka arrestuar shoferin 34-vjeçar.
Darren Herbert, menaxheri i operacioneve të Agjencisë Kombëtare të Krimit për portin e Dover u shpreh: “Ky konfiskim është dëshmi e mëtejshme e mënyrës se si rrjetet kriminale po përpiqen të shfrytëzojnë shpërthimin e koronavirusit për qëllimet e tyre. Ne po hetojmë se kush qëndron prapa kësaj përpjekje trafiku, por çka është e qartë është se ata kanë marrë një goditje të konsiderueshme…Kjo ngarkesë mund të kishte siguruar atyre më shumë se 1 milion paund”.
Po kështu autoritetet po verifikojnë edhe maskat që u gjetën në furgon, për të parë nëse janë të skaduara apo jo.
