Rolls-Royce fillon të ndjejë krizën nga pandemia. Kompania paralajmëroi shkurtimin e 9 mijë vendeve të punës si dhe do të ndërmarrë disa hapa të tillë përgjatë viteve në vijim, derisa industria e kompanive ajrore të rimarrë veten nga kriza pas koronavirusit.
Firma, e cila prodhon përveç automjeteve, edhe motorë për avionë, tha se reduktimi i thuajse 1/5 së forcës punëtore do të prekë kryesisht punonjësit e sektorit ajror.
“Kjo nuk është një krizë që e shkaktuam ne. Por kjo është kriza me të cilën ne do të përballemi dhe duhet të përballemi”, tha kreu i Rolls-Royce, Warren East.
Pjesa më e madhe e pushimeve është lajmëruar për fabrikat në Britaninë e Madhe. Rolls-Royce ka të punësuar 52 mijë punonjës në rang global dhe paralajmërimi për pushimin e 9 mijë punonjësve, nuk është projekti përfundimtar pasi duhet ende të konkludojnë diskutimet edhe me shoqatat.
Fluturimet ajrore u pezulluan për më shumë se dy muaj për shkak të pandemisë koronavirus dhe shumë linja kanë paralajmëruar edhe vetë reduktime të stafit. Vetë Rolls-Royce tha se impakti i pandemisë tek kjo kompani por edhe në të gjithë industrinë, është e paprecedentë. Nëse kjo skenë do të hyjë në fuqi, kompania Rolls-Royce pritet të reduktojë shpenzimet me thuajse 1.3 miliard paund në vit.
