Për mbrojtësin e Lushnjës, Marjus Korreshin, ekipi i tij i ka të gjitha mundësitë që të kualifikohet për në Superligë dhe të lërë pas dy rivalët kryesorë të momentit.
Korreshi ka theksuar faktin që skuadra e tij ka një grup që mbulon më së miri çdo repart të fushës dhe sipas tij në Kategorinë e Parë, Lushnja ka rival vetëm veten.
“Mendoj se Lushnja i ka të gjitha mundësitë për të hyrë në Superligë. Kemi një grup shumë të dhe në çdo repart të fushës mund të dallojmë nga ekipet e tjera, ku spikat kapiteni i ekipit Mikel Canka , i cili është edhe golashënuesi më i mirë i ekipit, por edhe Kategorisë së Parë. Është e vërtetë që rivaliteti nuk ka munguar asnjëherë në grupin B, por Lushnja rivale ka vetëm veten e saj.”-është shprehur lojtari që prej disa muajsh qëndron jashtë fushës së blerët për shkak të një dëmtimi.
Teksa ka folur në një intervistë për gazetën “Fjala”, 21-vjeçari lushnjar ka shtuar se derbi i Myzeqesë ka vetëm një fitues, që sipas tij ashtu siç e kanë treguar edhe ndeshjet e fundit është skuadra e Lushnjës.
“Lushnja këtë vit e ka fituar dy herë derbin e Myzeqesë dhe mendoj se edhe këtë radhë në stadiumin ‘Loni Papuçiu’ do dalim me fitore. Ekipi ka eksperiencën e duhur për të dalë me 3 pikë nga ky derbi. Stafi teknik po e përgatit mjaft mirë këtë ndeshje si fizikisht ashtu edhe teknikisht e taktikisht.”-ka thënë ndër të tjera Marjus Korreshi.
Nga Katerina Tafa
Si ka qenë periudha e karantinës për ty, duke qenë se izolimi ka penguar në stërvitje?
Periudha e karantinës ka qenë goxha e vështirë për të gjithë, megjithatë unë duhet ta theksoj se nuk kam qenë në gjendje optimale për t’u stërvitur 100%.
Ka shumë kohë që ndodhesh jashtë fushës, si është gjendja jote fizike tashmë?
Fatkeqësisht u bë shumë kohë e gjatë larg fushës së gjelbërt dhe më mungon shumë, por e tillë është situata. Ndërsa përsa i përket formës jam munduar që me anë të disa ushtrimeve në palestër të jem sadopak aktiv.
Kur pritet të rikthehesh në fushë e të bashkohesh me ekipin e Lushnjës?
Me ndihmën e doktorëve të ekipit shpresoj shumë që kjo situatë të kalojë sa më shpejt të jetë e mundur dhe të rikthehem sa më fortë.
Po ekipi si duket pas pushimit më shumë se dy mujor, sa ka ndikuar kjo periudhë në formën e skuadrës?
Çunat janë stërvitur sipas programit që stafi teknik na e ka dhënë gjatë periudhës së karantinës. Ekipin e kam ndjekur në seancat stërvitore dhe mendoj se çunat kanë marrë ngarkesën e duhur dhe janë në formë shumë të mirë.
A mendon se do ia dalë Lushnja të kalojë në Superligë këtë vit dhe si të duket rivaliteti me Apoloninë dhe Pogradecin?
Mendoj se Lushnja i ka të gjitha mundësitë për të hyrë në Superligë. Kemi një grup shumë të dhe në çdo repart të fushës mund të dallojmë nga ekipet e tjera, ku spikat kapiteni i ekipit Mikel Canka , i cili është edhe golashënuesi më i mirë i ekipit, por edhe Kategorisë së Parë. Është e vërtetë që rivaliteti nuk ka munguar asnjëherë në grupin B, por Lushnja rivale ka vetëm veten e saj.
Po në derbi, mendon se do ia dilni të fitoni si po ecin përgatitjet?
Lushnja këtë vit e ka fituar dy herë derbin e Myzeqesë dhe mendoj se edhe këtë radhë në stadiumin “Loni Papuçiu” do dalim me fitore. Ekipi ka eksperiencën e duhur për të dalë me 3 pikë nga ky derbi. Stafi teknik po e përgatit mjaft mirë këtë ndeshje si fizikisht ashtu edhe teknikisht e taktikisht.
Të flasim pak për të ardhmen, a ke pasur ndonjë ofertë për transferim në ndonjë skuadër tjetër?
Në fakt është e vërtetë që kam pasur oferta si nga klubet e Kategorisë së Parë ashtu edhe nga Superliga, megjithatë është shpejt për të folur për këtë gjë.
