Andi Koraqi, shef i laboratorit të mikrobiologjisë në QSUT, njëkohësisht edhe anëtar i grupit të ekspertëve të anti-Covid, thotë se nga lirimi i masave shtrënguese të karantinës dhe izolimit, shtimi i rasteve me Covid -19 për ekspertët ishte i pritshëm.
Në një lidhje direkte me emisionin e mëngjesit “Ditë e Re”, në RTV Ora, i pyetur nëse shifrat e të infektuarve që po raportohen dita ditës në rritje është shqetësuese apo jo, u përgjigj:
Sipas tij, deri në këto nivele, nuk është shqetësuese për aq kohë sa sistemi shëndetësor i përballon dhe se deri në këto shifra situata është normale.
“Ne nuk presim që të kemi një rënie drastike të këtyre numrave në vazhdimësi. Agresiviteti i virusit nuk është se ka rënë. Që të themi se ka rënë agresiviteti apo virulenca e virusit duhet të kemi evidenca gjenetike, pra duhet të gjejmë se virusi ka ndryshuar në mënyrë gjenetike. Unë përpara kam një studim i bërë nga një institucion shkencor anglez i cili thotë se kemi dy lloje virusi në qarkullim.
Kjo nuk është e konfirmuar, por asnjëra nga këto nuk tregon se virusi ka ulur virulencën. Nuk e them me bindje, por nga ana teorike transmetueshmëria mund të jetë ulur si pasojë e rritjes së temperaturave dhe uljes së lagështirës së ajrit.
Është vënë re që në ndërmarrje apo ambiente ku përpunohet mishi ku temperatura është e ulët dhe lagështia është e lartë kemi transmetueshmëri më të lartë të virusit sesa në ambiente të tjera ku temperatura është më e lartë”, tha ai./Bl.Ba/Fjala.al
