Tregtia botërore ka rënë me një nivel rekord në muajt e parë të vitit, për shkak të pandemisë së koronavirusit, por nuk arriti skenarin më të keq, sipas Organizatës Botërore të Tregtisë. Grupi me seli në Gjenevë, projektoi në muajin Prill se tregtia në mallra do të bjerë mes 13-32% në vitin 2020, përpara se të nisë rimëkëmbja në vitin e ardhshëm. Organizata nuk i ndryshoi shifrat në projeksionin e publikuar këtë Javë, por tha se reagimet qeveritare kanë ulur gjasat e skenarëve negativë.
Volumi i tregtisë në mallra u tkurr me 3% në tremujorin e parë, sipas Organizatës, dhe vlerësimet fillestare tregojnë për një rënie me 18.5% në tremujorin e dytë. “Rënia që do të shohim në këtë tremujor do të jetë më e madhja në historik. Por gjëja e mirë është se tkurrja mund të ishte akoma më e madhe”, tha kreu i Organizatës, Roberto Azevedo.
Sipas Organizatës, qeveritë kanë reaguar më shpejtë se gjatë krizës së vitit 2009 dhe mbështetja në të ardhura ka inkurajuar konsumatorët që të shpenzojnë, shkruan skantv.
Disa sektorë si prodhuesit e makinave kanë pësuar rënie të madhe, por të tjerë si pajisjet elektronike, e kanë përballuar mirë. Nëse tregtia rritet me 2.6% në tremujorin e tretë dhe të katërt, projeksioni më optimist për një tkurrje me 13% mund të arrihet, pavarësisht se është më keq se rënia gjatë krizës financiare me 12.5%. Organizata paralajmëroi se kufizimet tregtare dhe vala e dytë e infeksionit mund të pengojnë rimëkëmbjen në vitin 2021.
Bo.Ba/fjala.al
