Presidenti i Republikës Ilir Meta ka nderuar sot me dekoratën e lartë “Nderi i Kombit”, Koto Hoxhin, i cili do të flijohej i bindur në fitoren e kauzës shqiptare për liri, arsim dhe emancipim shoqëror.
Ndërkohë në Presidencë, kreu i shtetit ka pritur një grup nga Lunxhëria dhe tek një video që ka postuar në rrjetet sociale shihen teksa kërcejnë valle me një këngë të zonës.
Krahas videos, Meta shkruan se në shekuj Lunxhëria ia ka dalë të shkruajë faqe të lavdishme atdhetarie, arsimimi, kulture dhe emancipimi shoqëror, duke i falur Shqipërisë burra e gra të shquara.
“Në shekuj Lunxhëria ia ka dalë të shkruajë faqe të lavdishme atdhetarie, arsimimi, kulture dhe emancipimi shoqëror, duke i falur Shqipërisë burra e gra të shquara!
Këtu lindi dhe u edukua një nga Rilindasit e mëdhenj, pioneri i arsimit shqiptar, Koto Hoxhi, i cili mbolli në errësirën e kohës farën e dijes, të alfabetit dhe të gjuhës shqipe, dhe edukoi me ndjenjën e lirisë dhe krenarinë e identitetit kombëtar Pandeli Sotirin, Petro Nini Luarasin, por edhe shumë të tjerë.
Në vlerësim për kontributin e shquar në hedhjen e themeleve të arsimit dhe gjuhës shqipe, të rilindjes kulturore e letrare shqiptare, si dhe zgjimit të vetëdijes kombëtare në shërbim të luftës për pavarësinë e Shqipërisë, pata nderin të vlerësoj me Dekoratën e lartë “Nderi i Kombit”, Koto Hoxhin, i cili do të flijohej i bindur në fitoren e kauzës shqiptare për liri, arsim dhe emancipim shoqëror!
Me këtë gjest ne nderojmë kontributin e tij në shërbim të kombit, por edhe përcjellim mesazhin e përkushtimit patriotik për gjeneratat e reja!
Shqipëria që kemi sot nuk mund të ishte produkt i rrethanave të kohës, por vepër e sakrificave të panumërta.
Ndaj edhe shoqëria jonë ka nevojë më shumë se kurrë për burra dhe gra sa më atdhetarë dhe të përgjegjshëm për fatet e vendit! ??” shkruan Meta.
/En.Br./Fjala.al
https://www.facebook.com/ilirmetazyrtar/videos/281945486485251/
