Kryeministri i Kosovës, Avdullah Hoti gjatë konferencës për mediat ka folur dhe rreth takimit online me Presidentin e Serbisë, Aleksandër Vuçiç . Hoti u shpreh se u arrit dakortësia që të enjten të takohen në Bruksel.
“Dialogu nuk ka alternativë, dhe vetëm përmes dialogut mund t’i zgjidhim çështjet me Serbinë. Kam propozuar platformën e dialogut, ne në këtë proces hyjmë vetëm për njohjen reciproke dhe normalizimi i plotë i marrëdhënieve në mes të dy vendeve. Kemi arritur pajtueshmëri në parim, të kemi takimin e radhës në Bruksel, të ënjtjen që vjen, që është takimi parë pas 20 muajsh që është ndërprerë dialogu. Kemi prezantuar qëndrimin tonë shtetëror dhe jemi të gatshëm të ulemi në çdo tavolinë të dialogut për të mbrojtur shtetësinë e Kosovës dhe për të kërkuar normalizim të marrëdhënieve, që vjen vetëm pas njohjes reciproke në mes të dy vendeve”, ka thënë Hoti.
Bisedimet mes Hotit dhe Vuçiç u drejtuan nga përfaqësuesi i lartë i BE-së, Josep Borrell dhe Emisari Special i BE-së për dialogun Kosovë-Serbi, Miroslav Lajcak./Re.Gu/Fjala.al
