Ish-kapiteni kuqezi nuk do të jetë në stolin e Azerbajxhanit, trajneri italian ka bërë zgjedhje të tjera. Përkundër asaj që ishte raportuar fillimisht nëpër media, Ansi Agolli nuk do të jetë bashkëpunëtori i Gianni De Biasit tek përfaqësuesja e Azerbajxhanit, pasi italiani ka bërë të tjera zgjedhje.
“La Gazzetta dello Sport” shkruan se ish-trajneri i Shqipërisë ka përzgjedhur si bashkëpunëtorë të tij Beni Karbonen dhe Klaudi Beluçin, dy ish-sulmues të viteve ’90-‘2000 në Serinë A.
Gianni De Biasi i është kthyer detyrës së trajnerit pas gati 3 vitesh. Ish-trajneri i Shqipërisë do të drejtojë përfaqësuesen e Azerbajxhanit.
Fillimisht ishte raportuar se në stolin e kësaj përfaqësueseje, do të ishte edhe një “ish” i Kombëtares kuqezi, ish-futbollisti Ansi Agolli.
Ish-kapiteni i Shqipërisë kaloi në Azerbajxhan vitet më të mira të karrierës së tij. Ai luajti plot 8 vite me Karabakun, duke fituar 5 kampionate dhe 3 Kupa të Azerbajxhanit.
Ai arriti të luante me këtë ekip edhe në Ligën e Kampioneve dhe atë të Evropës. 64-vjeçari De Biasi ishte trajneri që hyri në historinë e futbollit shqiptar, duke arritur t’i drejtonte kuqezinjtë drejt kualifikimit për herë të parë, në fazën finale një veprimtarie ndërkombëtare, siç ishte Euro 2016-ta në Francë.
Italiani qëndroi 6 vite në krye të stolit të Shqipërisë, duke arritur bilancin më të mirë në historinë e Kombëtares kuqezi të futbollit.ka.ta/Fjala.al/
