Instituti i Shëndetit Publik ka reaguar pas akuzave nga ana e opozitës se vendi ynë po përballet me mungesë tamponësh për situatën kritike që po kalojmë të COVID-19.
ISHP i hedh poshtë këto akuza duke bërë me dije se janë rreth 90 mijë teste të disponueshme për t’iu përgjigjur pandemisë.
Sipas saj, në këtë situatë nuk duhet të bëhet politikë me COVID-19 dhe i bën thirrje opozitës që t’i bashkohen përpjekjes për të rritur ndërgjegjësimin e qytetarëve për respektimin e rregullave.
“Instituti i Shëndetit Publik vijon të jetë 24 orë në 7 ditë të javës në përgjigje të nevojave nga i gjithë vendi për testimet në kohë të qytetarëve të dyshuar, sipas hetimit epidemiologjik që kryhet në terren nga epidemiologët. Aktualisht kemi rreth 90 mijë teste në dispozicion dhe laboratori I ISHP vijon të furnizohet pa ndërprerje. Stafi i ISHP-së po punon 24 orë pa ndërprerje që nga fillimi i epidemisë, për të nxjerrë sa më shpejt në kohë përgjigjet për të gjitha rastet e dyshuar si të prekur nga Covid19.
I bëjmë thirrje PD dhe çdo force politike, të mos bëjnë politikë me Covid19 dhe të mos cënojnë punën e një ekipi të tërë të shëndetësisë, që janë në krye te detyrës për përballimin e situatës, por t’i bashkohen përpjekje për të rritur ndërgjegjësimin e qytetarëve për respektimin e rregullave të distancimit fizik, vendosjes së maskës dhe ruajtjes së higjienës”, thuhet në deklaratë.
/En.Br./Fjala.al
