Ka kurorëzuar në mënyrën më të mirë të mundshme një sezon mjaft të mirë dhe presidenti i Apolonisë, Koço Kokëdhima, nuk e ka fshehur kënaqësinë pasi skuadra fierake ngadhënjeu në finalen e Kategorisë së Parë me Kastriotin, duke fituar 2-1 në takimin e zhvilluar të mërkurën në mbrëmje në Stadiumin “Elbasan Arena”. “Në 95-vjetorin e Apolonisë ndihem shumë mirë, – ka deklaruar ai. – Ekipet tona e kremtuan këtë sezon në mënyrën më dinjitoze.”
“Të them të drejtën, nuk mbeta shumë i kënaqur nga loja, – ka vijuar kreu i klubit myzeqar, duke folur pas finales me Kastriotin. – Por, e dinë trajnerët, se, kur vjen puna te finalja, thonë se finalet fitohen, nuk luhen.” Po cili është projekti i Apolonisë në Kategorinë Superiore. “Do të shikojmë në ditët e ardhshme, – përgjigjet Kokëdhima. – Do të publikojmë të gjitha marrëveshjet. Do të ruajmë filozofinë që ekipi parë ushqehet nga skuadrat e moshave, do të përforcojmë të gjitha skuadrat.”
“E logjikshme është të bëjmë përforcime në të ardhmen jo thjesht me futbollistë që do të luajnë vetëm tek Apolonia, por të luajnë në kampionate të pasura, – vijon ai. – Për 6 prej lojtarëve tanë ka më shumë se 4 klube që i kërkojnë. Edhe në Kategorinë Superiore të Shqipërisë, edhe jashtë saj. Do të diskutojmë me stafin”, – përfundoi presidenti i Apolonisë, Koço Kokëdhima.ka.ta/Fjala.al/
