37-vjeçari që ka spikatur në portën e disa ekipeve në Superiore synon vazhdimin e karrierës. Për pak muaj mbush 38 vjeç, por, teksa pohon se e ka një ide për të ardhmen përtej futbollit të luajtur, Argent Halili e sheh ende veten midis shtyllave. “E kam menduar, – pohon ai, duke folur posaçërisht për Fjala.al. – E kam menduar të merrem me stërvitjen e portierëve.”
“Kam mbaruar një kurs trajnerësh dhe duhet të bëj edhe kursin për trajnerin e portierëve, por e shoh pak të largët sepse po ndjehem shumë mire dhe dua të luaj akoma futboll, – vijon vlonjati. – Shpresoj dhe besoj që do të jem pjesë e Superiores sezonin që vjen, por, edhe nëse kjo nuk realizohet, unë do të jem pjesë e futbollit të luajtur edhe për një vit.”
Për veteranin që ka veshur më parë fanellën e Kukësit, Flamurtarit, Kastriotit dhe Kamzës në Superiore, Oriku ishte një përvojë interesante. “Është sezoni i dytë që unë luajta me skuadrën e Orikumit, – rrëfen ai. – Ishte një përvojë krejt e re për mua, por u mësova, u përshtata dhe vitin e kaluar drejtuesit më dhanë një shpresë shumë të madhe në futboll dhe këtu u përshtata shpejt.”
“Natyrisht, niveli këtu nuk është aq i lartë sa në Superiore, aq më pak sa në Kupat e Evropës, ku kam luajtur, megjithatë, ka qenë një përvojë shumë e bukur, – pohon portieri i bregdetarëve. – Ky është një kampionat shumë i fortë, ka një rivalitet shumë të madh dhe këtë e ka treguar edhe gara në vazhdimësi, ndarja e grupeve, kështu që të gjitha këto të marra së bashku më dhanë një përvojë shumë të bukur.”
Portieri i mirënjohur e ka cilësuar si brenda pritshmërive këtë sezon të dytë të bregdetarëve modestë në nivelin e dytë të Kampionatit Kombëtar të Futbollit. “Të them të drejtën, po, i tillë ka qenë, – thekson gardiani i portës së Orikut. – Sepse ishin një sërë faktorësh që ndikuan nga pak në mbarëvajtjen e kampionatit, si ndërprerja e kampionatit nga epidemia e “Covid-19” dhe rikthimi i futbollistëve në stërvitje në nivele optimale fizike.”
“Megjithatë, përtej këtyre problemeve, arritëm t’ia dilnim me sukses, duke siguruar mbijetesën, por edhe duke e bërë këtë duke u renditur në krye të grupit tonë”, – ka përfunduar Argent Halili.
