Deputeti Enver Roshi, i cili u prek nga Covid 19, u dërgua për mjekim në Turqi disa kohë më parë.
Ai u shtrua fillimisht në repartin e terapisë intensive në spitalin “Shefqet Ndroqi”, ndërkohë që më pas udhëtoi drejt Turqisë për mjekim më të specializuar.
Një ditë më parë u dha dhe lajmi i mirë se deputeti Roshi ka dalë fitimtar ndaj këtij virusi, ndërsa në adresë të tij kanë qenë të shumta urimet që i janë dhënë.
Mes tyre është edhe mjeku Roland Shuperka i cili duke i uruar jetë të gjatë pas fitimit të kësaj lufte me Covid, ai ka dhe kritika ndaj kolegut të tij.
Përmes një postimi në rrjetin e tij social Facebook, Shuperka i rendit disa pika deputetit Roshi ku i kërkon llogari pse jeta e tij vlen më shumë se e të sëmurëve të tjerë që kurohen në spitalet tona, sa kushtoi kurimi atje, udhëtimi me charter, si dhe i kërkon të falënderojë taksapaguesit shqiptarë për shpenzimet në Turqi.
Postimi i plotë:
“Jetë të gjatë Enver!”
Sot nga media morëm lajmin që deputeti Enver Roshi ka dalë fitimtar ndaj coronavirusit dhe për më tepër “si mjek, profesor dhe politikan, (ai) shpreh mirënjohjen e thellë për cilësinë e trajtimit në spitalin turk”, ku u kurua pas vetëm një ditë qëndrimi në spitalin tonë (shqiptar).
Duke i uruar jetë të gjatë, por si politikan, ti Enver ke detyrimin kushtetues të transparencës, prandaj natyrshëm lindin këto pyetje dhe konstatime:
Një. Sa kushtoi kurimi në spitalin turk, duke përfshirë edhe transportin charter dhe kush i pagoi këto kosto?
Dy. Si mjek dhe profesor: Pse jeta juaj qenka më e vlefshme se jeta e atyre qindra qytetarëve të tjerë, ndërmjet të cilëve edhe mjekë e pedagogë të njohur, që vdiqën nga COVID-i në spitalet tona (shqiptare)?
Tre. Enver, ti duhet të falenderoje taksapaguesit shqiptarë dhe kryeministrin Rama, i cili aq shumë bën për deputetët e opozitës.
Katër. Ti, Enver, na qënke më i mirë se qytetarët e këtij vendi që po trajtohen në spitalet tona?/Bl.Ba/Fjala.al
