Veprimtaria e dytë e klubeve të kontinentit, Liga e Evropës, ka luajtur të premten në mbrëmje aktin e fundit të edicionit të saj të 49-të, duke kurorëzuar si fituese të saj, për herë të 6-të në histori, Seviljen, e cila mposhti në finale Interin, me rezultatin 3-2. Në fakt, kjo finale pati dy tablo të ndryshme në dy pjesët e lojës, teksa në 45 minutat e para loja ishte e vrullshme dhe prodhoi plot 4 gola, nga dy për secilën skuadër.
Italianët kaluan të parë në epërsi, por spanjollët barazuan dhe përmbysën gjithçka, por Interi rigjeti barazinë në shifra. Romelu Lukaku gjeti rrugën e rrjetës për zikaltërit, pas vetëm 5 minutash lojë, por gëzimi i italianëve zgjat vetëm 7 minuta, pasi Luk de Jong barazoi gjithçka. Është i njëjti lojtar që ka gjetur rrugën e rrjetës sërish për iberikët, duke përmbysur kështu në gjithçka në favor të Seviljes në minutën e 33-të.
Tri minuta më pas, italianët godasin me anë të Diego Godinit, i cili shënon një gol me kokë dhe në barazim 2-2 do të mbyllen 45 minutat e para. Ato të dytat do të jenë më të shterpëta, përkundër pritshmërive, edhe për arsye të lodhjes fizike, por edhe për arsye se skuadrat nisën të tkurren mbase duke kuptuar edhe koston që mund të kishin gabimet e mundshme.
Dhe nga një gabim i tillë ka ardhur edhe goli i 3-të i Seviljes, që do të rezultojë vendimtar sa i përket fatit të kësaj ndeshjeje. Diego Karlos do të ekzekutojë një rroveshiatë të bukur brenda zone dhe topi i tij devijohet në rrjetë nga Lukaku, i cili po përpiqej ta largonte atë. Interi është i pafuqishëm për të reaguar dhe, përtej 16 minutave të kohës së rregullt dhe 6 minutave shtesë, Sevilja fiton me shifrat 3-2.
La.Mi/Fjala.al
