Koloneli Hekuran Rapaj ka ndarë me ndjekësit e tij në Facebook historinë e trishtë të mikut të tij i cili humbi bashkëshorten nga Covid-19. Ai tregon se pak kohë më parë fëmijët e tij dhe bashkëshortja e mikut të tij, Artan Haskës, u infektuan me koronavirusin e rrezikshëm.
Ai tregon se miku i tij Artani kaloi një periudhë të vështirë gjatë kohës që familjarët e tij të infektuar po merrnin mjekim të spitalet COVID në Tiranë.
Shkrimi i plotë:
“NJOFTIM I HIDHUR
Sot, në paraditen e datës 22 gusht 2020, mora lajmin e hidhur, që shokut tonë, djalit shtëpëziot, Artan Haskës, i ndërroi jetë, në moshë të re, bashkëshortja e tij, Nëna e dashur e 3 fëmijëve (një djalë dhe dy vajza).
Artani kaloi kështu një peripeci dhe vështirësi të jashtëzakonshme. Që në fundin e muajit korrik 2020, iu sëmurën nga e flamosura Coronë, djali dhe vajza që banonin në Korçë, të cilët i prunë në spitalin COVID 2 në Tiranë dhe qëndruan atje për më se 20 ditë në gjendje të rëndë, por fatëmirësisht e kaluan pa rrezik për jetën e tyre.
Pas këtyre, në fillim të muajit gusht, sëmuret po nga COVID 19 edhe bashkëshortja e Artanit, e cila kaloi në një gjendje të rëndë, jashtë mase, në terapi intensive, dhe fatkeqësisht nuk e fitoi dot betejën me virusin vrastar vdekjeprurës.
Në spitalin COVID 2, “Shefqet Ndroqi” edhe pse ju bënë të gjitha shërbimet e duhura dhe një kujdes i jashtëzakonshëm nga mjekët, infermierët dhe familja e të afërmit e saj, përsëri fati i zi e goditi rëndë.
I shprehim ngushëllimet bashkëfshatarit tonë, Artan Haskës dhe familjes së të ndjerës, shëndet fëmijëve që ende nuk e kanë marrë veten. Ne me shpirt jemi pranë kësaj familjeje shtëpëziote, pranë Artani dhe fëmijëve, në pamundësi për t’i qenë më afër, atje prezent. Kushtet kështu erdhën.
Goditja është e madhe, por Artan kurajo, kurajo dhe kujdes për fëmijët.
I qoftë dheu i lehtë.
Ngushëllimet tona.”,shkruan Hekuran Rapaj.
