Kolonelët Arben Kingji e Ilir Xhebexhia janë dy gjeneralët e rinj të Forcave të Armatosura të Shqipërisë. Ata janë dekretuar sot nga Presidenti i Republikës Ilir Meta me gradën “gjeneral brigade”.
Kolonel Arben Kingji mban aktualisht detyrën e komandantit të Batalionit të Mbështetjes në Shtabin e Përgjithshëm të Forcave të Armatosura. Gjeneral brigade Arben Kingji ka ushtruar edhe detyra të tjera si ajo e atasheut ushtarak të Republikës së Shqipërisë në Rumani. Me herët ai ka qenë edhe komandant i Policisë ushtarake. Ka kryer Kursin e Shtabit të Përgjithshëm në Akademinë e Mbrojtjes në Tiranë. Gjeneral brigade Kingji ka mbajtur detyrën e komandantit të kontigjentit në disa misione në Afganistan e Irak.
Në vitin 2016 ai përfundoi edhe studimet për drejtësi në Winsdom University. Për kontributet e tij në Forcat e Armatosura, gjeneral brigade Arben Kingji është nderuar me disa medalje. Ai mban edhe medaljen e Artë të Shqiponjës, dhënë nga Presidenti i Republikës.
Kolonel Ilir Xhebexhia aktualisht mban detyrën e zëvendëspërfaqësuesit ushtarak në NATO, atashe ushtarak i Republikës së Shqipërisë në Belgjikë dhe jo-rezident në Francë, në Përfaqësitë Ushtarake Jashtë Vendit. Ai ka përfunduar Kursin e Oficerit të Shtabit të Përgjithshëm në Akademinë e Mbrojtjes. Ndërsa në 2006 – 2007 ka qenë oficer koordinator, pranë Komandës Qendrore Amerikane Tampa-Florida USA. Ai ka ushtruar edhe detyra si zëvendëskomandant i Qendrës së Radio-Zbulimit, nënkolonel, oficer Shtabi për Inteligjencën, Përfaqësia Ushtarake – Bruksel.
Ai ka marrë pjesë në disa misione ndërkombëtare si: stërvitja “Rescuer”, Maqedoni; oficer koordinator “Rescuer”, Maqedoni; misioni i SFOR-it në Bosnje-Hercegovine; operacioni “Liria Irakut” (C-2 në CJTF-7) në Bagdad.
Në formimin e tij, tashmë gjeneral brigade Ilir Xhebexhia numëron edhe një sërë kursesh në Turqi, Gjermani, Greqi, Holandë. Gjatë karrierës së tij, gjeneral brigade Xhebexhia është vlerësuar me disa dekorata, përfshirë; “Medalja e NATO-s për Misionin e Paqeruajtjes” 1998, dhënë nga sekretari i Përgjithshëm i NATO. Ai botoi dy libra, “Liria e Irakut” në 2006 dhe “Evropa Juglindore Proceset Integruese” në 2007 dhe bashkëautor në disa botime të tjera.
