Djali 14-vjeçar i Presidentit Donald Trump, Barron, ka rezultuar pozitiv me Covid-19, por është asimptoma, bëri me dije Zonja e Parë Melania Trump të mërkurën.
“Për fat të mirë ai është një adoleshent i fortë dhe nuk shfaqi asnjë simptomë,” tha zonja Trump në një deklaratë.
Ajo tha se ajo vetë dhe i biri Barron tashmë kanë rezultuar negativë në testin e dytë për virusin.
Presidenti Trump komentoi gjatë një tubimi me mbështetësit në shtetin Ajova, duke e sjellë shërimin e djalit të tij si provë se shkollat duhet të hapen.
“Unë madje nuk mendoj se ai e dinte që e kishte (virusin), sepse ata janë të rinj, sistemi i tyre imunitar është i fortë dhe ata e luftojnë atë. Dërgojini fëmijët përsëri në shkollë, ne duhet t’i kthejmë fëmijët përsëri në shkollë,” tha Presidenti Trump./VOA
