Pavarësisht masave të marra për parandalimin e përhapjes së virusit COVID-19 në vend, duket se shkollat po kthehen në vatra të infeksionit.
Shkolla të ndryshme të arsimit parauniversitar në vend paraqesin raste të shumta pozitive me virus, ndërsa ngrihen pikëpyetje, nëse këto shifra do të sjellin mbylljen e shkollave dhe rikthimin e mësimit on line.
Nga Ina Allkanjari
Bota po gjunjëzohet përballë pandemisë COVID-19, ku me miliona qytetarë janë konfirmuar pozitivë me koronavirus dhe mijëra të tjerë e kanë humbur betejën me “armikun e padukshëm”. Ndërsa një valë e dytë e virusit po përhapet në Evropë, Shqipëria po paraqet shifra më të larta sesa në fillim të pandemisë.
Ndonëse në vend janë rikthyer masat kufizuese, ku prej disa ditësh tashmë mbajtja e maskave në ambiente të hapura dhe të mbyllura është e detyrueshme, ende shifrat e të prekurve me virus vijojnë të paraqiten të larta.
Në 24 orët e fundit në Shqipëri është vendosur një tjetër rekord negativ, pasi u shënuan 295 raste të reja me koronavirus nga 1413 testime që u realizuan. Kur ndodhemi rreth 1 muaj pas rihapjes së shkollave dhe fillimit të mësimit për arsimin parauniversitar në vend, vijojnë të paraqiten raste pozitive me virus mes arsimtarëve dhe nxënësve.
Gjatë ditës së djeshme në shkollën 9-vjeçare “Emin Duraku” në kryeqytet kanë rezultuar të infektuar me koronavirus 5 mësues dhe 3 sanitare. Më herët në këtë shkollë dolën pozitivë 5 mësues të tjerë dhe 29 persona u karantinuan. Mësohet se për këta 29 kanë dalë përgjigjet e tamponit, nga ku rezultuan positive edhe 5 mësues dhe 3 sanitare, duke e çuar numrin e përgjithshëm të të prekurve në këtë shkollë në 13 persona.
Bëhet me dije se mësuesit e infektuar do të zëvendësohen më mësues të tjerë, në mënyrë që mësimi të vijojë pa ndërprerje për nxënësit. Në lidhje me infektimet në këtë shkollë, ka reaguar Drejtoria e Përgjithshme e Arsimit Parauniversitar, duke deklaruar se në shkollën 9-vjeçare “Emin Duraku” në kryeqytet, mësimi po vijon normalisht.
DPAP-ja sqaron në reagimin e saj se për shkak të infektimeve në këtë shkollë, ku si pasojë disa mësues të tjerë janë karantinuar, nga ana e DPAP-së janë marrë masat të menjëhershme për zëvendësimin e tyre, në mënyrë që mësimi të vijojë pa ndërprerje. “Dëshirojmë t’ju informojmë se mësimi në këtë shkollë po vijon normalisht.
Për shkak se disa mësues kanë rezultuar me COVID-19 dhe disa të tjerë janë karantinuar, nga ana e DPAP-së dhe zyrës arsimore vendore Tiranë janë marrë masat e menjëhershme për zëvendësimin e tyre në mënyrë që mësimi të vijojë pa ndërprerje. Njëkohësisht, është shtuar edhe numri i psikologëve për të qenë sa më pranë nxënësve e mësuesve me shërbimin psiko-social.
Ndërkohë, procesi i dezinfektimit në këtë shkollë është kryer 3 herë gjatë gjithë javës së shkuar, kurse dezinfektimi më i fundit është realizuar ditën e djeshme”, deklaron DPAP-ja. Më tej në reagim ky institucion i siguron prindërit dhe të gjithë opinionin publik se po punohet intensivisht që ambientet e shkollave të jenë të sigurta, me higjienizim të vazhdueshëm, me masa që respektohen e me nivel të lartë ndërgjegjësimi nga ana e nxënësve, mësuesve dhe e gjithë stafit ndihmës të shkollave.
Ndërkohë gjatë ditës së djeshme janë shënuar raste pozitive me COVID-19 edhe në disa shkolla të tjera të arsimit parauniversitar. Në shkollën 9-vjeçare “1 Maji”, në Tiranë, kanë rezultuar pozitivë me virus një mësuese dhe një nxënës.
Ndërkohë mes rasteve pozitive të konfirmuara në Gjirokastër, mësohet se është konfirmuar me virus një mësuese te shkolla 9-vjeçare “Urani Rumbo” dhe një nxënës në një shkollë 9-vjeçare private. Si rrjedhojë, bëhet me dije se i janë marrë tamponet të gjithë stafit mësimdhënës në të dyja shkollat.
Ministria e Shëndetësisë dhe Mbrojtjes Sociale apelon qytetarët që të vijojnë të jenë të kujdesshëm në zbatimin e masave anti-COVID për të frenuar përhapjen e këtij infeksioni. Rihapja e shkollave e rrit mundësinë e shtimit të rasteve, ndaj, sipas Ministrisë së Shëndetësisë, kujdesi i prindërve, mësuesve dhe nxënësve duhet të jetë më i lartë.
Për shkak të rritjes së shifrave të të infektuarve me COVID-19 në vend, qeveria ka marrë masa shtesë për të parandaluar përhapjen e virusit. Kujtojmë se më 15 tetor, maskat u bënë të detyrueshme edhe në rrugë, si pjesë e parandalimit të infektimit me koronavirus.
Situata epidemiologjike
Koronavirusi vijon të shënojë fatalitete në vend. Gjatë 24 orëve të fundit kanë ndërruar jetë me COVID-19, tre qytetarë, duke e çuar numrin total të viktimave në 454. Ministria e Shëndetësisë bën me dije se betejën me COVID-19 e ka humbur një 47-vjeçar nga Tirana, një 53-vjeçare dhe një 64-vjeçar nga Durrësi, me sëmundje bashkëshoqëruese.
Aktualisht, në Spitalin Infektiv dhe në atë “Shefqet Ndroqi” po trajtohen 259 pacientë, 22 në terapi intensive, nga të cilët 4 pacientë janë të intubuar. Ndërkohë mësohet se gjatë 24 orëve të fundit janë kryer 1413 teste, ku kanë rezultuar pozitivë me virus 295 qytetarë.
Rastet pozitive të konfirmuara në 24 orët e fundit janë identifikuar në këto bashki: 74 të prekur në Tiranë, 39 të prekur në Durrës, 30 raste në Shkodër, 22 raste në Lushnjë, 12 raste në Vlorë, 11 raste në Fier dhe Pogradec, 10 raste në Krujë dhe Berat, 9 raste në Elbasan dhe Lezhë, 7 raste në Gjirokastër, 6 raste në Kurbin, 5 raste në Divjakë, 4 raste në Kukës, Tropojë, Përrenjas, Skrapar, 3 raste në Sarandë, Gramsh, Kuçovë, 2 raste në Has dhe Shijak, 1 rast në Fushë-Arrëz, Devoll, Kavajë, Mirditë, Rrogozhinë, Mallakastër, Librazhd, Mat, Përmet, Roskovec, Klos. Gjatë ditës së djeshme, gjithashtu, u regjistruan 96 qytetarë të shëruar, duke e çuar në 10167 numrin e të shëruarve në vend që prej fillimit të epidemisë.
Ministria e Shëndetësisë dhe Mbrojtjes Sociale u drejtohet me një thirrje qytetarëve që të tregohen të kujdesshëm me respektimin e rregullave. “Shkujdesja e vërejtur favorizon përhapjen e virusit, i cili po prek çdo moshë, pa dallim. Përdoreni maskën kudo në ambientet jashtë shtëpisë, ruani distancën dhe kujdesuni për higjienën”, deklaron Ministria e Shëndetësisë.
Përdorimi i maskës
Në një video-mesazh të publikuar nga ministrja e Shëndedetëisë, Ogerta Manastirliu, mjeku Tritan Kalo tregon rëndësinë e përdorimit të maskës gjatë kësaj periudhe pandemie. Sipas tij, maska duhet mbajtur gjatë gjithë kohës për të pakësuar rrezikun e infektimit me anë të gojës apo hundës, por edhe për të mbrojtur të tjerët.
“Problemi është për të mbyllur mundësinë e përhapjes së infeksionit në popullatë. Dhe një nga këto mënyra për të mbyllur, ose për të pakësuar rrezikun e infeksionit, është pikërisht mbyllja e hyrjes së mikroorganizmit që quhet Sars-Cov 2 në rrugët tona të sipërme respiratore dhe mbajtja e një maske ose e një mbulese të këtyre vijave për të pakësuar sasinë e dëpërtimit të virusit në organizmin tonë”, shpjegon Kalo, teksa thekson se në këtë situatë është më e lehtë që virusi të parandalohet sesa të kurohet.
Detaj
Gjatë 24 orëve të fundit kanë ndërruar jetë me COVID-19, tre qytetarë, duke e çuar numrin total të viktimave në 454. Aktualisht, në Spitalin Infektiv dhe në atë “Shefqet Ndroqi” po trajtohen 259 pacientë, 22 në terapi intensive, nga të cilët 4 pacientë janë të intubuar. Ndërkohë mësohet se nga1413 teste të realizuara në 24 orë, kanë rezultuar pozitivë me virus 295 qytetarë.
Tabelë
COVID-19 – Statistika (19 tetor 2020)
Raste të reja ditore 295
Të shëruar në 24 orë 96
Humbje jete në 24 orë 3
Testime ditore 1413
Testime totale 108.782
Raste pozitive 17350
Raste të shëruara 10167
Raste aktive 6729
Humbje jete 454
Shpërndarja gjeografike e rasteve aktive sipas qarqeve:
Tiranë 3307
Durrës 693
Shkodër 477
Fier 419
Korçë 404
Lezhë 350
Elbasan 293
Vlorë 243
Berat 202
Kukës 172
Dibër 86
Gjirokastër 83
