Në Ditën Botërore të luftës ndaj diabetit presidenti Ilir Meta ka kërkuar rimbursim për kategoritë më në nevojë.
Në një postim në rrjetet sociale kreu i shtetit shprehet se kjo kërkesë është ende e paplotësuar, ndërsa thekson se në kushtet e pandemisë kjo duhet parë me përparësi absolute.
“Sot, Dita Botërore e luftës kundër Diabetit, e gjen Shqipërinë me rreth 75 mijë qytetarë, të cilët vuajnë nga diabeti i tipit 2 dhe tipit 1. Ndërkohë që konstatohet edhe një rritje e numrit të fëmijëve të prekur prej saj. Një nga kërkesat e drejta, por të pazgjidhura ende, është ribursimi për kategoritë më në nevojë, që për shkak të kushteve të vështira ekonomike e kanë të pamundur përballimin e kostove të larta të mjekimit“, shkruan Meta.
Më tej ai shton se në situatën e pandemisë COVID-19, situata në të cilën ata ndodhen duhet parë me përparësi absolute, nëpërmjet paketave konkrete të ndihmës ekonomike, të dedikuara në parandalimin e përkeqësimit të mëtejshëm të shëndetit të tyre.
“Të prekurit nga diabeti, në mjerim dhe varfëri, të mbështeten dhe të mos braktisen nga shteti”, shprehet Meta./Bl.Ba/Fjala.al
