Zhgënjen piloti i “Suzuki”-t dhe pretendenti për titull, Joan Mir. Një tjetër ekskluzivitet i Rrjetit të Radio-Televizionit Shqiptar është edhe Kampionati Botëror i Motoçiklizmit, aty ku të dielën do të zhvillohet gara e parafundit e sezonit, ajo e Çmimit të Madh të Valencias.
Franko Morbideli do të niset i pari të dielën, pasi triumfoi të shtunën në provat zyrtare.
Do të jetë piloti i skuadrës kliente të “Jamaha”-s, “Petronas”-it, Franko Morbideli ai që do të niset i pari të dielën në Çmimin e Madh të Valencias në MotoGP, teksa kryesuesi i renditjes së përgjithshme të pilotëve, Joan Mir, nuk arriti të siguronte më tepër sesa vendi i 12-të, pas rivalit Fabio Kuartararo.
E shtuna ishte një ditë “jo” për skuadrën e “Suzuki”-t, pasi piloti tjetër dhe rivali tjetër për titull, Aleks Rins, do të niset nga vendi i 14-të të dielën.
Një shi i lehtë i përshëndeti garuesit në nisje të provave zyrtare, por, në një betejë të ethshme, Vinjalesi regjistroi një kohë të shpejtë me 1 minutë, 30 sekonda e 645 të mijëtat, por shpejt u parakalua nga Xhek Milleri i skuadrës kliente të “Dukati”-t, “Pramak”-ut, që e uli në 1 minutë, 30 sekonda e 287 të mijëtat.
Por as kjo kohë e mirë nuk mundi ta ndalte Franko Morbidelin të pilotonte “Jamaha”-n drejt një kohe prej 1 minutë, 30 sekonda e 191 të mijëtat.
Duke siguruar, për herë të dytë këtë sezon, nisjen nga vendi e parë në garën e së dielës me një epërsi prej vetëm 96 të mijëtat e sekondës. Krahas Morbidelit dhe Millerit, radhën e parë të nisjes do ta plotësojë Taka’aki i “LCR Honda”-s, ndërsa në radhën e dytë do të rreshtohen Johan Zarko, Pol Espargaro dhe Maverik Vinjales.
Rreshtin e 3-të do ta plotësojnë Aleiks Espargaro, Françesko Banjaja dhe Bred Binder, kurse 10-shen e të parëve do ta plotësojë Migel Oliveira.
l.m/fjala.al
