Ashtu sikundër në mbarë kontinentit, Covid-19 ka prekur edhe klubet shqiptare, teksa në Kategorinë Superiore ka patur të infektuar tek Bylisi, tek Partizani dhe tek Vllaznia, ndërkohë, që së fundmi e ka pësuar trajneri i Kukësit, Skënder Gega.
Por virusi ka zbritur edhe në Kategorinë e Parë dhe Fjala.al shkruan se janë dy futbollistë dhe disa anëtarë të stafit të infektuar te Lushnja. Dionis Musaku dhe Adriatik Basha janë të infektuarit, kurse Fabian Blakçori dhe Aldo Qoshku presin përgjigjen e tamponit.
Ndërkaq, edhe trajneri Ilir Gjyla do të duhet ta drejtojë skuadrën me telefon në ndeshjen kundër Tomorit, e programuar të zhvillohet të shtunën, duke nisur nga ora 14:00, teksa ia vetë dhe disa anëtarë të stafit teknik dyshohen si të prekur.
Situata nuk është aspak e qetë te verdhejeshilët dhe sidomos kur dihet që vetëm nesër do t’u duhet që të zbresin në fushë për të luajtur kundër Tomorit, të vlefshme për javën e 3-të të Kategorisë së Parë.
Fillimisht u tha se kapiteni Dionis Musaku dhe mbrojtësi Adriatik Basha ishin të dëmtuar, por ndryshe paraqitet situata. Ata janë të karantinuar dhe për 2 javë nuk mund të lëvizin nga shtëpia. E megjithatë, stresi thellohet pasi janë në pritje të përgjigjes së tamponit edhe mesfushorët Fabian Blakçori dhe Aldo Qoshku.
E gjithë kjo situatë ia komplikon ndjeshëm llogaritë edhe Ilir Gjylës, i cili duket se është vetë i prekur. Kur dihet që ka disa mungesa prej dëmtimeve, listës i shtohen edhe të prekurit nga virusi.
Sipas burimeve pranë klubit lushnjar, pritet që të premten në mbrëmje do të vijë përgjigjja për dy të dyshuarit. “Mbrojtësi Adriatik Basha është pozitiv, presim të mbarojë karantinimin, që të kthehet pranë ekipit.
Kapiteni Dionis Musaku ka rezultuar pozitiv dhe është në karantinim 14-ditor. Për mesfushorët Fabian Blakçori dhe Aldo Qoshku presim përgjigjen e tamponit sot në mbrëmje”, – kanë sqaruar burimet në fjalë.
l.m/Fjala.al
