Besim dhe optimizëm në kampin shkodran për ndeshjen e së shtunës me Tiranën. Kjo gjë është shprehur edhe në deklaratën e trajnerit Tomas Brdariç gjatë konferencës së sotme për shtyp ku është shprehur i sigurt për një paraqitje solide.
“Sigurisht e njoh dhe e ndjej rëndësinë e kësaj ndeshje, – ka deklaruar gjermani. – Ne duhet të përqendrohemi në gjërat thelbësore dhe mos të shikojmë të kaluarën.”
Po cila është gjendja e skuadrës? “Është shumë e mirë dhe me shumë besim, – është përgjigjur kreu i stolit kuqeblu. – Ne po punojmë shumë fortë për të arritur objektivat tona. Fokusi jonë është te ndeshja e nesërme dhe duhet të jemi të thjesht pasi luajmë ndaj kampionëve të Superligës e për këtë arsye jemi shumë të motivuar.”
Shumë kanë sugjeruar se kjo është prova e parë e vërtetë për Vllazninë këtë sezon, por Brdariçi nuk mendon kështu. “Jo nuk e mendoj kështu, thotë ai. – Ne e kemi nisur mirë kampionatin dhe jemi të fokusuar te ndeshja e nesërme. Çdo ndeshje për ne ka specifikën e vetë dhe kjo për ne është thjesht ndeshja e radhës. E di që për Shkodrën kjo nuk është një ndeshje e zakonshme.”
Vllaznia nuk ka frikë nga kjo ndeshje, teksa trajneri i saj thotë: “Kemi shumë respekt për Tiranën, por jo frikë. Ne jemi përgatitur shumë mirë, kam një ndjesi të mirë dhe kam besim se do të marrim 3 pikë në këtë sfidë. Ne duhet të vazhdojmë të punojmë shumë pasi nesër luajmë ndaj kampionëve në fuqi dhe duhet të kënaqemi për këtë takim.”
Dhe, së fundmi, a do ta quante barazimin dështim me Tiranën? “Ne luajmë për 3 pikë dhe nuk futemi në fushë se çfarë ndodh pas ndeshjes, – ka deklaruar Brdariçi. – Do të jetë një ndeshje e fortë dhe unë e njoh Tiranën. Kemi edhe një ditë kohë deri nesër dhe do të jemi të motivuar e të përqendruar. Nuk kemi përse të flasim shumë, por duhet të tregojmë në fushë.”
Pa.Va/Fjala.al
