Komiteti Teknik i Ekspertëve ka dalë sot në një komunikim me mediat dhe ka raportuar situatën e deritanishme.
Zv. ministrja e Shëndetësisë, Mira Rakacolli tha se java në vijim është një javë e rëndësishme për vlerësimin epidemilogjik në lidhje me treguesit dhe pastaj në bazë të shifrave do të vlerësohet efikasiteti i masave dhe në gjykimin se si do të vazhdojë gjendja.
Ajo deklaroi se javën e ardhshme duke parë ecurinë e rritjes së rasteve të reja dhe vdekjeve nga COVID do të merret vendimi për masat.
“Na duhet një javë tjetër për të parë nëse do të vazhdojnë kjo qëndrueshmëri për të vlerësuar nëse duhet të vendosim masa të reja”, deklaroi Rakacolli.
Ndërsa Drejtoresha e ISHP Albana Fico bëri me dije sot se në Shqipëri kemi 356 raste me të infektuar për 100 mijë banorë, shifër sipas saj më e ulët se vendet e rajonit që raportojnë 848 raste për 100 mijë banorë e më e ulët se mesatarja e vendeve të BE që në 2 javët e fund është 510 raste për 100 mijë banorë.
Sipas Ficos, dy prefekturat me incidencë më të lartë të të infektuarve vijojnë të jenë Tirana e ndjekur nga Gjirokastra e Lezha. Grupomosha e të prekurve mbetet në intervalet 55-64 vjeç e ndjekur nga 65-75 vjeçarët.
“Vihet re qëndrueshmëri e numrit të pacientëve të shtruar në spitalet Covid, por ka rritje të lehtë të rasteve që kanë nevojë për terapi intensive. % e humbjes së jetëve në raport me nr të të infektuarve vijon të mbetet në shifrën 2.1%”, tha Fico./Bl.Ba/Fjala.al
