Një 53-vjeçar ka përfunduar në gjyq, pas denoncimit që djali i tij i mitur ka bërë si pasojë e dhunës që është ushtruar ndaj tij. Shtetasi L. N., është gjykuar nën akuzën e “keqtrajtimit të të miturve”, ku në përfundim të gjykimit është dënuar me 3 muaj burg. Ngjarja ka ndodhur në Kamëz, ndërsa familja në fjalë janë me origjinë nga Puka. 16-vjeçari E. N., iu drejtua komisariatit nr.5., në muajin qershor të vitit 2020.
Ai ka kallëzuar babanë e tij, shtetasin L. N., për ushtrimin e dhunës psikologjike dhe fizike ndaj tij në mënyrë të vazhdueshme. Shkak i ushtrimit të dhunës është përdorimi i pijeve alkolike nga ana e babait të tij, dhe për këtë fakt kallëzuesi është pajisur dhe me urdhër të menjëhershëm mbrojtje me vendimin Nr. 8596 datë 05.05.2020 të Gjykatës së Rrethit Gjyqësor Tiranë.
Episodi i datës 19.06.2020 ka qenë për shkaqe banale dhe kallëzuesi pretendon se babai i tij e ka kapur me thonj tek pjesa e brinjëve dhe e ka ngritur në peshë, lart. Më tej ai ka vijuar fjalë kërcënuese në drejtim të fëmijëve. Pas marrjes së kallëzimit nga ana e policisë gjyqësore është mbajtur procesverbal i kqyrjes fizike të shtetasit Ervis Nimani ku nga këqyrja u konstatuan shenja tek pjesa e brinjëve të anës së majtë, u konstatuan shenja gërvishtjeje dhe mavijosjeje në madhësinë 10 cm me 5 cm.
Në vendimin e Gjykatës së Tiranë, i siguruar nga MCN TV, thuhet se, i pyetur si person ndaj të cilit zhvillohen hetime, i arrestuari L. N., pranon që ka ndodhur ky konflikt por iniciatori ka qenë djali i tij dhe L., ka ndërmarrë veprimin e mësipërm për ta larguar djalin nga vetja.
Ndërkohë, edhe pse ka patur shenja dhune të dukshme, ato nuk janë klasifikuar në vepër penale, pasi janë klasifikuar si shenja të shkaktuar në rrahje. “Është urdhëruar kryerja e ekspertimit mjeko ligjor për dëmtimet e kallëzuesit, të miturit E. N., ku nga administrimi në dosje i katit të ekspertimit mjeko ligjor Nr. 529 datë 29.06.2020, ka rezultuar se dëmtimet e shtetasit E. N., hyjnë në kategorinë e dëmtimeve të parëndësishme, të rrahjeve”, thuhet në vendim.
Për këtë, dhunuesi i fëmijës, shtetasi L. N., është marrë i pandehur vetëm për akuzën e “keqtrajtimit të të miturit”. Gjatë shqyrtimit gjyqësor, 53-vjeçari është shprehur se situatat e dhunës kanë ndodhur si pasojë e vështirësive ekonomike që familja e tij ndodhet. Për këtë, si është shprehur se nuk do të ndodhë më.
Në përfundim, gjykata ka vendosur ta dënojë për këtë vepër penale më 3 muaj burg. Si pasojë e gjykimit të shkurtuar, i pandehuri L. M., është dënuar përfundimisht me dy muaj burg.
