Komisioni Qendror i Zgjedhjeve (KQZ) në Kosovë, ka marrë vendim për rinumërimin e 494 vendvotimeve në Qendrën e Numërimit dhe Rezultateve.
Vendimi është marrë sot pas një mbeldhje të KQZ pasi ka mospërputhje të të dhënave ndërmjet kandidatëve për deputetë dhe subjektit politik nën siglën e të cilit ata kanë kandiduar, pas zgjedhjeve të 14 shkurtit.
“Një numër i madh i formularëve të kandidatëve nuk kanë mundur të procesohen si të rregullta për shkak të mos përputhjes së të dhënave. Pasi ka kandidatë që ka më shumë vota se subjekti politik. Ndërsa ka raste kur subjekti ka vota, e kandidatët nuk kanë dhe anasjelltas”, ka thënë kryeshefi i sekretariatit të KQZ-së, Burim Ahmetaj.
Sipas KQZ-së arsyet e rinumërimit kanë të bëjnë me: bartje të gabuar të votave në formularin e subjekteve politike (35 vendvotime); bartje të gabuar të votave në formularin e kandidatëve (6 vendvotime); kandidati apo kandidatët kanë më shumë vota se subjekti politik (370 vendvotime); dhe subjekti ka vota ndërsa kandidatët jo dhe anasjelltas (83 vendvotime).
